Rusiye advokatı Nikolay Polozov, qırımtatar milliy areketi veteranı Veciye Kaşkanıñ elâk oluvı şartlarını mustaqil surette tahqiq etüv çerçivesinde Rusiye Tahqiqat komitetiniñ qırımlı hanımnıñ elâk oluvı vaqiası boyunca iş açmaqnı red etkenini tayin etti. Bunı Polozov fevral 22 künü özüniñ Facebookında bildirdi.
Onıñ bildirgenine köre, Rusiye Cinaiy kodeksiniñ 105-nci maddesiniñ 1-nci qısmı ve 109-ncı maddesiniñ 4-nci qısmına (qasten öldürüv, muqaytsızlıq ile öldürüv, zarar körgenniñ ölümine ketirgen sağlıqqa qasten ağır zarar ketirüv) muvafıq olaraq Veciye Kaşkanıñ ölümi vaqiası boyunca eki cinaiy işniñ açılmasını red etüv aqqında qararnı 2018 senesi yanvarniñ soñunda Rusiye Tahqiqat komitetiniñ Qırımdaki baş idaresine boysunğan Aqmescitteki Kyiv rayonı boyunca tahqiqat bölüginiñ uyken tergevcisi tarafından «cinayetlerniñ vaqiası olmağanı içün» qabul etilgen edi.
Advokat, mustaqil tahqiqatını devam etkenini qayd etti.
Polozov: «Veciye Kaşkanıñ elâk oluvı şartlarınıñ tahqiqatını devam etecegim. Teşkerüv materialları ile tanışuv aqqında arizanı endi tergevcige yolladım», – deye qayd etti.
Fevralniñ başında Rusiye advokatı Nikolay Polozov, Qırımda 2017 senesinde qırımtatar milliy areketi veteranı Veciye Kaşkanıñ ölümini mustaqil surette tahqiq etmege başlağanını bildirdi. Onıñ aytqanına köre, Veciye Kaşkanıñ ölümi – «onı qanunsız olaraq yaqalağan Rusiye telükesizlik hadimleri tarafından adden aşırı ve ğayrı-mutenasip quvet qullanuvnıñ neticesidir».
2017 senesi noyabrniñ 23-nde Aqmescitte Rusiye telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olar Türkiye vatandaşından «aqsız yerde hususan büyük miqdarda para talap etüv»de qabaatlanalar.
Rusiye telükesizlik hadimleri tarafından yaqalanmaları esnasında qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni aqqında haber alındı.
Ukrainanıñ qıtadaki qısmında bulunğan QMC prokuraturası tintüvler, yaqalavlar ve qırımtatar milliy areketiniñ veteranı Veciye Kaşkanıñ ölümi vaqiaları boyunca cinaiy işler açtı.
Veciye Kaşka – qırımtatar milliy areketiniñ veteranıdır. O, 1934 senesinde Aluştanıñ yanındaki Üsküt (şimdi Privetnoye) köyünde doğdı. Qırımtatar halqı 1944 senesinde sürgün etilgen soñ Veciye Kaşka qorantasınen Üzbekistanda yaşadı. 50-nci yıllarda o, aqayı Bekirnen beraber qırımtatar milliy areketine qoşuldı.
