Daa evel Rusiye tarafını tutqan pek çoq Qırım sakini özüni aldatılğan is etti ve yarımadada Rusiye prezidentiniñ saylavına barmaycaqlar. Bu fikirni Qırım.Aqiqatqa Qırımda Rusiye tarafını tutqan faaliyetçi Lenur Usmanov bildirdi.
Onıñ aytqanına köre, Qırım sakinleri, böyle etip, yarımadanıñ parkları ve yalı boyu zonasında yapılğan qurucılıqqa ve Rusiye tarafını tutqan Qırım ukümetiniñ diger areketlerine qarşı narazılıq bildirecekler.
Usmanov: «Men Qırım sakinlerinen çoq suhbetleşem. Pek çoq kişi özüni «ğalipler taqımı» tarafından aldatılğan is ete. Adiy adamlarnı topraqtan marum eteler, aynı zamanda parklar ve yalı boyunda qurucılıq Qırım sakinleri körmegen mıqyasta yapıla. İnsanlar Moskvanıñ, Qırım sakinleri tarafından berilgen şikâyetnameleri boyunca iç bir çare körmeyip, Qırım rehberlerine keri yollağanından umütleriniñ nafile olğanını añladı», – dep, bunıñ iştirakke tesir etecegini ve onıñ seviyesi Qırımda alçaq olacağını ilâve etti.
Mart 12-de Qırımtatar Milliy Meclisi, muracaatnameni yayınlap, içinde qırımtatarlarnı ilhaq etilgen Qırımda Rusiyeniñ prezident saylavında iştirak etmemegedavet etti.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaq etilgeniniñ yıllığına tayin etildi.
Mart 1-de Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
