Link açıqlığı

Saatnıñ esas haberi

Qırımtatar Milliy Meclisi, muracaatname yayınlap, içinde qırımtatarlarnı ilhaq etilgen Qırımda Rusiyeniñ prezident saylavında iştirak etmemege davet etti.

Bunı özüniñ Facebooktaki saifesinde Qırımtatar Milliy Meclisiniñ reisi Refat Çubarov bildirdi.

Bildirüvniñ metninde: «Qırımtatarlar Rusiye işğalcileri tarafından vaqtınca işğal etilgen Qırımda qanunsız 2018 senesi mart 18 saylavında iştirak etmeycekler», – denile.

Qırımtatar Milliy Meclisi, «Ukrainanıñ Qırım yarımadası üzerindeki devlet akimiyetiniñ eñ qısqa vaqıtta temin etilmesi ve Qırım statusınıñ, Ukraina tamır halqı olaraq qırımtatar halqınıñ öz taqdirini özü tayin etmek aqqı esasında tiklenilmesi içün bütün çareler körecek», dep qayd ete.

Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.

Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG