Kremlde Rusiye prezidenti Vladimir Putinniñ ilhaq etilgen Qırımğa yapacaq ziyareti azırlana. Bunı Rusiye devlet başlığınıñ matbuat kâtibi Dmitriy Peskov bildirdi.
Mart 12-de Rusiye haber agentlikleri: «Prezident qayda rey berecek, şimdilik aytamam. Adet üzre o, bunı Moskvada yapa. Başqa bir yer saylanacaq dep tüşünmek içün mende sebep yoq, amma Rusiyeniñ er bir saylavcısında olğanı kibi, bunıñ içün elektoral ve qanuniy ceetten esas bar», – dep, Peskovnıñ sözlerini naqil eteler.
Bunıñ arfesinde Rusiyeniñ kütleviy haber vastaları, mart 14-te Putin prezident saylavından evel soñki ziyareti olğan – Qırımnı ziyaret etecegini bildirdiler.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaq etilgeniniñ yıllığına tayin etildi.
Mart 1-de Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
