Mart 14, carşenbe künü, Vladimir Putin prezident saylavı ögündeki bölgelerge ziyaretlerinden soñkisi – Qırım ziyaretini yapacaq. Bunı Rusiyeniñ «Dojd» telekanalı bildire.
Neşir menbalarınıñ bildirgenine köre, Putin Qırımda «kampaniyası esnasındaki ekinci biñlerce adam toplağan mitingde iştirak etecek». Onı Aqyarda ötkermek isteyler.
Rusiye telekanalı, bu malümatnı Rusiye prezidentiniñ matbuat kâtibi Dmitriy Peskov tasdiqladı, dep iddia ete.
KHV: «Bu, referendumnıñ yıllığı. Qırım ve Aqyarda o, pek emiyetli ve qayd etile», – dep, Peskovnıñ sözlerini naqil ete.
Rusiye prezidentiniñ saytında şimdilik bu malümat tasdiqlanmadı.
Fevralde Rusiyedeki «Kommersant», Putin Qırımğa saylav kününde uçaqnen kelmek mumkün, dep yazğan edi.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaq etilgeniniñ yıllığına tayin etildi.
Mart 1-de Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
