Rusiye prezidenti vazifesine namzet olğan Kseniya Sobçak, 2014 senesinde Rusiye tarafından ilhaq etilgen soñ yarımadağa, «Сноб.ru» içün reportaj yazmaq maqsadınen barğanını bildirdi.
Сибирь.Реалии içün bergen intervyüde Sobçak: «2014 senesinde biz Qırımğa barıp, Anton Krasıvskiy ile birlikte o vaqıt anda olıp keçkenler aqqında « Сноб» neşiri içün malümat topladıq. Biz reportaj azırlay edik. Şimdi menim statusım printsipial olaraq başqa, men Rusiye prezidenti vazifesine namzetim, Anton Krasovskiy ise menim vekilimdir», – dep bildirdi.
Sobçak, Rusiye Devlet Dumasınıñ Qırımdan deputatı Natalya Poklonskayanıñ, onıñ Qırımnı ziyaret etkeni aqqında söylegenlerini iza eterken, «Natalya Poklonskaya kibi idare etilgen personajlar ile dialog açmaq ve, bir şey etip, olarğa cevap bermek azır olmağanını» söyledi.
Sobçak: «Meni bu vaziyette meraqlağan tek şey – aqları muntazam surette bozulğan insanlarnıñ aqları ve menfaatlarıdır, böyle insanlar ise Qırımda iç şübhesiz bar. Ve olar maña, ayatları ve taliyleri şimdi nasıl vaziyette olğanlarına diqqat etmek ricaları ile muracaat eteler», – dep ikâye etti.
Daa evel Poklonskay içtimaiy ağlarda, Sobçaknıñ 2014 senesiniñ aprelinde Qırımda onda «musafirlikte» olğanını yazğan edi. Sabıq Rusiye prokurorı, Ukraina ukümetinden Qırımğa barmaq içün izin sorağan Sobçaknıñ areketlerinde «cinayet alâmetleri olmaq mumkün», dep saya.
Martnıñ 6-sında «Vatandaşlar teşebbüsi» fırqasından Rusiye prezidenti vazifesine namzet olğan Kseniya Sobçak Rusiyede Ukrainanıñ elçiligine, Qırımğa Ukraina territoriyasından kirmege izin sorap, mektüp yollağanını bildirdi.
Ukraina İnformatsion siyaset nazirliginde, Sobçak ilhaq etilgen Qırımğa Ukrainanıñ qıtadaki territoriyası tarafından munasip teşkerüvlerden soñ bara bilecegini bildirdiler.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
