Qırımtatar Milliy Meclisiniñ reisi Refat Çubarov, kelecekteki kollaboratsiya aqqında qanun işlep çıqılğanda, onıñ kütleviy degil de, şahsiy mesuliyetni közde tutacağına diqqat etmek kerek, dep tüşüne.
Bunı o, martnıñ 8-nde «5-nci kanal»nıñ efirinde söyledi.
Çubarov: «Bu qanunnıñ maqsadı, cezalanacaq olğan büyük sayıda insanlarnı mumkün olğan derecede daa keniş surette qaplap almaq olmamalı. Biz, mesuliyet seviyesi, kollaboratsiyağa daluv derecesi boyunca vaziyetni tayin etmek kerekmiz. İnsan, kollaborantlar ukümetine aza olıp kirse, bu bir, amma öz vazifesinde qalıp, misal içün, mektep mudiri ya da baş ekim olaraq çalışsa, bu bam-başqadır», – dedi.
Onıñ fikrine köre, böyle qanun azırlanğanda «pek muqayt olmaq kerek».
Çubarov: «Öyle olmamalıdır ki, işğal altında qalğanlar episi özüni qabaatlı is etsin. Qırımda insanlarnıñ çoqusı Ukrainanıñ qaytqanını beklerken, özüni raat is etmeli», – dep, qayd etti.
2017 senesiniñ noyabrinde Ukraina prezidentiniñ Qırım Muhtar Cumhuriyetinde daimiy temsilcisi Boris Babin, Ukraina qanunlarında Rusiye tarafından ilhaq etilgen Qırım sakinleri içün «işğalciler ile kollaboratsiya» añlamınıñ tariflenmegenini bildirdi.
Daa soñra Vaqtınca işğal etilgen territoriyalar boyunca nazirlikte, kollaboratsiya aqqında qanun deokkupatsiyanıñ arfesinde peyda olmaq kerek, dep bildirdiler.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
