Link açıqlığı

Saatnıñ esas haberi

Kurkçi: kollaboratsiya aqqında qanun Qırımnıñ azat etilmesinden aldın peyda olmaq kerek


Yusuf Kurkçi, arhiv fotosı
Yusuf Kurkçi, arhiv fotosı

Ukrainanıñ Vaqtınca işğal etilgen territoriyalar ve devlet içinde köçürilgen şahıslarnıñ işleri boyunca nazirligi yolbaşçısınıñ birinci muavini Yusuf Kurkçi, kollaboratsiya aqqında qanunnıñ, Qırımnıñ azat etilmesinden aldın peyda olmaq kerekligini söyledi.

Bunı o, Qırım.Aqiqat Radiosınıñ «Qırımda efirniñ yüz künü» marafonı çerçivesinde söyledi.

Kurkçi: «Nazirlikniñ yanaşuvına köre, böyle vesiqa Ukrainanıñ Qırımğa kirmesi arfesinde peyda olmaq kerek. Fikrimizce, bu, o anda pek büyük insan gruplarınen belli bir dialognı alıp barmağa imkân bercek tam kerekli bir alet olacaqtır», – dedi.

Onıñ aytqanına köre, eger Ukraina «bugün endi, iç bir perspektivası olmağanda bu adamlarnı qabaatlı ilân etse», bu eñ evelâ Kyiv içün büyük zorluqlar doğuracaq.

Kurkçi: «Biz bu qabaatnı isbatlamaq ve qabaatlı adamnıñ, cezasını alıp, onı çekmesini temin etmek kerekmiz», – dedi.

Daa evel Ukraina prezidentiniñ Qırım Muhtar Cumhuriyetindeki temsilcisi Babin, Ukraina qanunlarında Rusiye tarafından ilhaq etilgen Qırım sakinleri içün «işğalciler ile kollaboratsiya» añlamınıñ tayin etilmegenini söyledi.

Ukrainadaki İnsan aqları boyunca Helsinki birliginiñ adliyecisi Darya Sviridova, Kyivde, işğal etilgen topraqlarda yaşağanlarnıñ Rusiye akimiyeti ile işbirligi içün mesuliyetlik derecesini tayin etmek içün iş grubunıñ meydanğa ketirilgenini bildirgen edi.

Qırımdaki Rusiye akimiyeti tarafından açıq menbalarda bu hususta izaatlar berilmedi.

Halqara teşkilâtları, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri oña qarşı bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

Dekabrniñ 13-nde Qırım.Aqiqat Radiosı efirinde AM orta dalğalarında – sıqlığı 549 kHz, 105,9 FM ve Qırım.Aqiqat saytında «Qırımda efirniñ yüz künü» marafonı devam ete. Radio diñleyicileri Qırım.Aqiqat Radiosınıñ canlı efirine telefon aça bileler. Ukrainanıñ qıtasında yaşağan diñleyiciler içün studiyadaki telefon nomerası 044 490 29 05, Qırım sakinleri içün – 8800 10 06 926.

2017 senesi sentâbrniñ 4-nde Qırım.Aqiqat Radiosı FM diapazonınıñ 105,9 MHz sıqlığında yayınlarını başladı ve aynı zamanda 549 AM orta dalğalarındaki yayınlarını devam etti. İlhaq etilgen Qırımğa signal Herson vilâyetiniñ cenübinde, Çonğarda tiklengen radioqulesinden yollana.

XS
SM
MD
LG