Link açıqlığı

Babin: Ukrainada Qırım sakinlerine nisbeten «işğalcilernen işbirlik» tabiri daa tayin etilmedi


Ukraina prezidentiniñ Qırım Muhtar Cumhuriyetindeki daimiy temsilcisi Boris Babin, Ukraina qanunları Rusiye tarafindan ilhaq etilgen Qırım sakinlerine nisbeten «işğalcilernen işbirlik» tabirini daa tayin etip olamadı, dep saya.

Bu aqta o noyabrniñ 24-nde matbuat konferentsiyasında ayttı, dep bildire «İnterfaks Ukraina».

«Afsus ki, bizler Qırım sakinlerine nisbeten, hususan işbirlikniñ sıñırı ne yerde bitkenine dair, yekâne uquqiy siyaset işlep çıqaramadıq», – dey Babin.

QMC daimiy temsilcisi eki misal ketirdi: birisi - Aqmecsit devlet universitetinde dotsent olaraq çalışsa, digeri de - Qırımnıñ yerli memuriyetiniñ idariy vazifesinde çalısşa ne yapılmalı.

«O, işbirlik yapqan sayılâmı ve vatan hainligi içün mesuliyetke çekilmesi mümkünmi? Bizlerniñ alâ daa, afsus ki... yekâne pozitsiyamız yoq», – dedi o.

Bu yıl sentâbr ayınıñ 1-ne qadar QMC prokıuraturası mahkemege Qırım Muhtar Cumhuriyeti Yuqarı Şurasınıñ sabıq deputatına qarşı azırlanğan 53 dane qabaatlav vesiqası yolladı.

Ukraina Baş prokuraturası, Rusiye Qırımnı ilhaq etken soñ, antına hainlik etip yarımadadan esas topraqqa qaytmağan 73 ukrain arbiyini devlet hainliginde qabaatlay.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey.

XS
SM
MD
LG