Qırımtatar faaliyetçisi Suleyman Kadırovnıñ içtimaiy ağdaki «ekstremistik» post içün taqip etilmesiniñ kerçek maqsadı, razı olmağanını susturmaq tırışuvından ibarettir. Bunı Qırım.Aqiqat Radiosı efirinde «Agora» halqara aq-uquq qorçalayıcıları gruppasınıñ advokatı ve qabaatlanğannıñ qorçalayıcısı Aleksey Ladin bildirdi.
Advokat: «Mahkeme, qararında Suleyman Kadırovğa yalıñız şartlı olaraq eki yıl caza bermeyip, aynı zamanda cemiyet içünde ve şu cümleden İnternet ağında faaliyet köstermekni yasaq etti. Menim fikrimce, cinaiy işniñ açılmasınıñ maqsadı da, tamam bu qoşumca berilgen cezalav edi. Yani Suleyman Kadırov, Kefede qırımtatar liderlerinden biri ve faaliyetçi olaraq, öz fikrini daima açıqtan bildire ve insanlarğa yol köstere edi. Ve ükümet ile uquqqoruyıcı organlarnıñ begenmegeni de tamam şu edi. Olar onı susturacaq oldılar», – dedi.
Qırımtatar Milliy Meclisiniñ azası, Qırımtatar halqınıñ aqlarını qorçalav komitetiniñ reisi Eskender Bariyev de aynı fikirdedir.
Meclis azası: «Bu kerçekten de Suleyman Kadırovnı susturmaq, qaviy bir noqtai-nazarğa malik olğan Qırımdaki bütün yurtdaşlarımızğa, susmasalar, olarğa qarşı da böyle işler açılacaq, dep halq ögünde köstermek ıntıluvıdır. İşğalci ukümetniñ repressiv maşinası böyle etip, insanlarnı qorquzmaq ve Rusiyeniñ Qırımdaki cinayetleri aqqında bir şey söylememege mecbur etmek içün er şey yapa.
Kremlniñ kontroli altında bulunğan Kefe şeer mahkemesi martnıñ 1-nde qırımtatar faaliyetçisi Suleyman Kadırovnıñ işi boyunca qararını ilân etti. Mahkeme oña şartlı olaraq eki yılğa azatlıqtan marum etüv ve bu muddet içünde cemiyet içinde faaliyet köstermekni yasaq etüv cezasını tayin etti.
Fevralniñ 28-nde Rusiye prokurorı Suleyman Kadırov içün şartlı olaraq üç yılğa azatlıqtan marum etüv ve cemiyet içünde faaliyet köstermekni yasaq etüv cezasını istedi.
2016 senesiniñ oktâbrinde Rusiye telükesizlik hadimleri qırımtatar faaliyetçisi Suleyman Kadırovnıñ evini tintmek içün keldi ve ondan noutbuk ile telefonını aldılar. 2016 senesi oktâbrniñ 11-nde Kadırov separatizmden şübheli tanılıp, oña qarşı cinaiy iş açıldı.
Qabaatlavnıñ versiyasına köre, Kadırov 2016 senesi martında, özüni Aqmescitten bir qırımtatar olaraq tanıtqan ve Ukrainanıñ kontroli altında olmağan Donetsk ve Lugansk vilâyetlerini azat etmek içün «Qırım» batalyonınıñ meydanğa ketirilmesi aqqında bildirgen nasıldır Demyan Demyanenkonıñ videoroligini repost etti. Bir qaç aydan soñ repostnıñ altında, içinde, cümleden, «Qol tutam, Qırım evelden de, şimdi de ve kelecekte Ukraina olacaq» sözleri olğan Kadırovnıñ izaatı peyda oldı. Oña qarşı Rusiye Cinaiy kodeksiniñ 280.1 maddesi boyunca iş açıldı. Qabaatlav FSB ekspertleri tarafından yapılğan ve Kadırovnıñ izaatında Rusiyeniñ topraq bütünliginiñ bozulmasına davet olğanını isbatlağan ekspertizağa esaslana.
2017 senesiniñ aprelinde Rusiyeniñ maliy monitoringi boyunca hizmeti Kadırovnı ekstremistler ve terroristler cedveline kirsetti.
Kadırov özü, cinaiy işi – öz noqtai-nazarını faal surette ifade etkenine ve aq-uquqnı qorçalav saasındaki faaliyetlerine cevaben mahsus hizmetler tarafından yapılğan provakatsiyadır, dep iddia ete.
