Ukrainada Amnesty International halqara aq-uquq qorçalayıcı teşkilâtı Rusiyeni Yaltadaki «Hizb ut-Tahrir işi»niñ altı figurantlarını deral azat etmege ve taqiplerini toqtatmağa davet ete. Bu hususta teşkilâtnıñ saytında aytıla.
Amnesty International Ukraina müdiri Oksana Pokalçuk: «Emir-Useyin Kuku ve «Yalta işi» azalarınıñ saçma, uydurılğan ve esassız qabaatlavlar esasındaki cinaiy taqibi toqtatılmalı ve bütün qabaatlanğanlar azat etilmeli. Kuku 2016 senesi fevral 12-de tevqif etilgenine qadar defalarca FSBniñ tazyıqına oğradı. Evinde eki kere tintüv yapıldı. Aq-uquq qorçalayıcısı endi parmaqlıqlar artında bulunğanda onıñ ömür arqadaşı ve küçük yaşlı oğlu Rusiyeniñ mahsus hizmetleriniñ agentleri tarafından taqip etildi ve qorqutıldılar», – dedi.
Rusiye arbiy mahkemesi Yaltadaki «Hizb ut-Tahrir işi»ni Aqmescitteki seyyar oturışuvlarında baqa edi. Ondan soñ tevqif etilgen Qırım sakinlerini Rostov-na-Donu şeerine yolladılar.
2016 senesiniñ fevral-aprel aylarında Yaltada Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk yaqalandı. Olarnı Rusiyede yasaq etilgen «Hizb ut-Tahrir» İslâmiy siyasiya teşkilâtına alâqadar olğanlarında qabaatlaylar.
Yanvar 24-te Ukraina Tış işleri nazirligi Rusiyeden «Yaltadaki Hizb ut-Tahrir işi»niñ altı figurantını azat etmege talap etti.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi din alâmetine köre yapıla, dep sayalar. Advokat Emil Kurbedinov, Rusiye uquqqoruyıcı organları tarafından bu iş boyunca esas olaraq qırımtatarlar taqip etilip, olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruplarğa ait Qırım sakinleriniñ de taqip etilgenlerini qayd ete.
Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.
