Ukraina tış işleri nazirligi Rusiyeden, daa evel Şimaliy-Kavkaz okrugınıñ arbiy mahkemesi otırışuvlarında iştirak etmek içün Qırımdan Rostov na-Donu şeerine keçirilgen Yaltalı «Hizb ut-Tahrir işiniñ»altı figurantını azat etmesini talap ete.
«İlk-evelâ Rusiye ukrain vatandaşlarını Qırımdan hırsızlap aldı, şimid ise – nevbetteki mahkeme. Narazılıq bildirip azat etilmelerini talap etemiz», – dep yaza Betsa.
Yanvarniñ 24-nde Şimaliy-Kavkaz okrugınıñ arbiy mahkemesinde Yaltalı «Hizb ut-Tahrir işiniñ» altı figurantınınen bağlı ilk mahkeme otırışuvı başlandı.
Yaltalı «Hizb ut-Tahrir işiniñ» (Rusiye ve ilhaq etilgen Qırımda yasaqlanğan teşkilât) figuranları Arsen Cepparov ve Refat Alimov 2016 senesi aprelniñ 18-nde Qızıltaşta tevqif etilgenden berli apiste yatalar. İlk dört Yaltalı «Hizb ut-Tahrir işiniñ» mabüsi 2016 senesi fevralniñ 11-nde tutulğan edi. Olardan arasında insan aqları kontakt gruppasınıñ azası Emir-Üsein Kuku, qurucı olaraq çalışqan aluştalı Muslim Aliyev ve Qızıltaş köyüniñ sakini Enver Bekirov, em de Yaltalı çeçek satıcısı Vadim Sirük bar.
2017 senesiniñ soñunda «Yaltalı altı kişi»nen bağlı taqiqat bitkeni aqqında malüm olğan edi. Qabaatlanğan şahıslar Rostov na-Donu şeerine keçirildi. Şimaliy-Kavkaz arbiy mahkemesi mahkeme otırışuvı qapalı şekilde keçire.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
