Adliyeciler Suvdağda yanvarniñ 27-sinde «Qırım birdemligi»niñ oturışuvı esnasında Rusiye polis hadimleri tarafından adamlarnı qanunsız olaraq yibermeyip bir yerde tutqanlarına qarşı şikâyet azırladılar. Bunı Qırım.Aqiqat Radiosınıñ canlı yayınında Qırım uquqçısı Lilâ Gemeci söyledi.
Adliyeci: «Men telükesizlik hadimlerinden areketlerini esaslandırmaq ve özlerini taqdim etmekni talap ettim. Uzun sürgen söz davasından soñ polis hadimlerinden biri köküs jetonını çıqardı, ve jurnalistler onıñ nomerasını qayd ete bildiler. Artıq yanvarniñ 29-nda biz, polis hadimleriniñ, psihologik tazyiq yapıp ve polis bölügine alıp baracaqları ile qorquzıp, şahsiy territoriyada toplanğan adamlarnı qanunsız olaraq dört saattan ziyade yibermeyip tuttılar. Bu, İnsan aqları ve esas ürriyetleriniñ qorçalanması aqqında konventsiyadaki 5-nci maddeniñ bozuluvıdır», – dep qayd etti.
Yanvarniñ 27-nde Suvdağda «Qırım birdemligi» cemiyet teşebbüsiniñ oturışuvına Rusiye OMONınıñ hadimleri keldi. Telükesizlik hadimleri, olarğa «bu adres boyunca silâlı toplaşuv keçe», dep telefon etkenlerini añlattılar. Olar tedbir iştirakçilerinden pasportlarını taqdim etmekni talap etip, aksi alda er kesni, avtozaklarğa yüklep, poliske alıp ketecekleri ile qorquza ediler.
İlhaqtan soñ Qırımda ameldeki Rusiye akimiyeti mustaqil jurnalistler, cemiyet faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarınıñ evlerinde muntazam surette kütleviy tintüvler yapa.
