«Tavrida» trassasınıñ quruluvı esnasında tapılğan arheologik buluntılar ve şu cümleden barbar qabileleriniñ resimleri Şarqiy Qırım tarih ve medeniyet muzey-qoruğınıñ balansına berilmekteler.
Bunı Qırımnıñ Rusiye akimiyetine yaqın olğan «Krıminform» saytı, Keriç Qadimiy eşyalar muzeyiniñ baş muafızı Natalya Bıkovskayanıñ sözlerini naqil etip, bildire.
Onıñ aytqanına köre, umumen yılnıñ soñuna qadar muzeyniñ balansına qararnen 20 biñ eksponat teslim etilecek.
Bıkovskaya: «Tapılğan barbar qabileleriniñ resimleri, halqlarnıñ büyük köçüvine şaatlıq etken nadir yadikârlıqlardır. Qırımda böyle unikal artefaktlarnıñ sayısı yüzden az ve olar, büyük ihtimal ile, milâttan evelki III asırğa aitler», – dedi.
Qadimiy resimler Keriçte qurulmaqta olğan Keriç köpüri ile «Tavrida» trassası arasında qurulayatqan yolnıñ yanında bozulğan «Gospitalnıy» yeraltı mezarı divarlarında tapıldılar. Qadimiy qurğan yer ile yeksan etilmeden evel resimlerni taş qalavınıñ bir qısmı ile beraber sökip aldılar.
Natalya Bıkovskaya, buluntılarnıñ balansqa alınuvı endi başlandı, dep iddia ete. Onıñ aytqanına köre, Keriç köpüri ve «Tavrida» trassasınıñ quruluvları esnasında bir sıra buluntılar yer üstünde ve suv altında tapıldı.
Daa evel qazılıp açılğan antik devirge ait «Gospitalnıy» qurğanını topraqnen toldurmaq qararı aqqında 2017 senesinde Rusiye ilimler akademiyasınıñ Arheologiya institutında bildirdiler.
Rusiye arheologları Milâttan evelki IV asırğa ait qabirni 2017 senesiniñ yazında territoriya üst yol keçitiniñ qurulması içün azırlıq yapılğanda qazıp açtılar.
Daa evel Ukrainanıñ Medeniyet nazirliginde, Rusiye arheologları tarafından ilhaq etilgen Qırımnıñ territoriyasında qanunsız olaraq yapılğan qazılmalarğa qarşılıq köstermek içün bir sıra halqara teşkilâtlarğa muracaat etmek planları aqqında bildirgen ediler.
2017 senesiniñ fevralinde Ukrainanıñ UNESCO işleri boyunca Milliy komissiyası, ortaq devletlerni Rusiye tarafından ilhaq etilgen Qırım territoriyasına monitoring missiyasını yollamağa davet etti.
