AQŞ Devlet departamentiniñ Ukraina boyunca mahsus vekili Kurt Uolker, kelecekte Rusiyeniñ Donbass ve Qırımda Ukrainağa ketirgen zararı aqqında suhbetinden evel işğal etilgen territoriyalarda insanlar içün «barışıq, telükesizlik ve normal ayat başlanğanında» qanmaq kerek, dep tüşüne.
Bunı o, Azatlıq Radiosı içün bergen mahsus intervyüde söyledi.
Uolker, Rusiye Ukrainağa Donbassta ve Qırımnıñ ilhaqı neticesinde ketirilgen zararlarnı ödeycekmi, sualine cevap berip: «Anda yaşağan insanlar içün barışıq, telükesizlik ve normal ayat başlağanında, anda meydanğa kelgen hümanitar facianıñ artıq yoq olğanında ve Ukrainanıñ suverreniteti ile topraq bütünliginiñ tiklenilgeninde qanmaq eñ muimdir, dep tüşünem», dedi.
Onıñ aytqanına köre, yalıñız durğun barışıq başlağan soñ «tiklenüv ve ğayrıdan quruluvnı qayğırmaq» mümkün olacaq.
Uolker: «İç şübhesizdir ki, bu territoriyalar Ukrainanıñ qısmı olmaq kerekler. Abadan qısmı», – dep qayd etken soñ, Ukrainanıñ Donbass ve Qırım munasebeti ile körgen zararları meselesi – «kelecek içün mevzudır», dep urğuladı.
Qırım ve Aqyar şeeri territoriyasında 2014 senesi martnıñ 16-sında yarımadanıñ statusı boyunca dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de AQŞ referendumdaki rey berüvniñ neticelerini tanımadılar. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
2014 senesiniñ baarinde Qırım ilhaq etilgen soñ Donbassnıñ bir qısmında arbiy çatışma başlandı. Ukraina ve Ğarp Rusiyeni, onıñ tarafını tutqan uruşçılarğa qol tutqanında qabaatlaylar. Moskva bu qabaatlavlarnı red ete. Ğarp, uruşçılarğa qol tutqanı ve Qırımnı ilhaq etkeni içün Rusiyege qarşı sanktsiyalarnı tatbiq etti.
