Qırımtatar Milliy Meclisiniñ reisi Refat Çubarov Qırımnıñ bütün milletlerge ait sakinlerini, martnıñ 18-nde yarımadada birinci kere yapılacaq Rusiye prezidenti saylavını boykot etmege davet etti. Bunı o, Facebooktaki saifesinde beyan etti.
Refat Çubarov, yanvarniñ 27-sinde Suvdağda Rusiye telükesizlik hadimleri «Qırım birdemligi» cemiyet teşebbüsiniñ oturışuvına OMON ve avtozaklar ile basıp kelgenlerinden soñ böyle bildirüv yaptı.
O: «Añlaşıla ki, rus işğalcileri qırımtatar faaliyetçilerini qorquzmaq içün nevbetteki areket yaptılar. Diğer taraftan, pek açıq ve inandırıcı olğan bu areket, işğalciler tarafından Rusiye «prezident»iniñ qanunsız saylavı tayin etilgen 2018 senesi mart 18 kününde Qırımnıñ bütün sakinlerine özüni nasıl tutmaq kerek olğanını eñ anlayışlı şekilde köstere», – dep bildirdi.
Refat Çubarovnıñ fikrine köre, qırımtatarlarnıñ «ekseriyeti «saylav»ğa öyle de barmaycaq». Ondan ğayrı o, bütün milletlerge ait Qırım sakinlerini bu saylav ceryanını boykot etmege davet etti.
Qırımtatar Milliy Meclisiniñ reisi: «Bugünkine oşağan areketlerden soñ zayıflıq ya da cesaretsizlik kösterip 2018 senesi martnıñ 18-nde saylav bölüklerine kelecek az sayıdaki yurtdaşlarımıznıñ er biri, soydaşları ve dindaşları arasında ömürlik cemaat masqarası olacaq. İşğal etilgen Qırımda qanunsız olğan 2018 senesi martnıñ 18-ne tayin etilgen saylavnıñ boykotı mutlaqa yapılmalı. 2018 senesi martnıñ 18-nde iç bir qırımtatar, iç bir ukrain, milletine baqmadan Ukraina vatanperveri olğan Qırımnıñ iç bir sakini vaqtınca işğal etilgen Qırımda qanunsız tayin etilgen Rusiye prezidenti saylavınıñ qanunsız açılğan saylav bölüklerine kelmemeli!», – dep yazdı.
Rusiye prezidentiniñ saylavı 2018 senesi martnıñ 18-ne – Rusiye tarafından Qırımnıñ ilhaqı yıllığına tayin etildi. Saylavnıñ başqa künge avuştırılmasını közde tutqan qanunnı Rusiyeniñ Devlet duması ile Fedratsiya Şurası tasdiqladılar ve Rusiye prezidenti Vladimir Putin imzaladı.
Rusiye prezidenti saylavında birinci kere Qırım sakinleri iştirak etecek – saylav ceryanı yarımadada teşkil etilecek.
