Advokat Nikolay Polozov Qırım.Aqiqat içün bergen izaatta, Qomşu Rusiyeniñ territoriyasında Qırımtatar Milliy Meclisi reisi muavinleri Ahtem Çiygoz ve İlmi Umerovnıñ uquqiy statusı belli degil, çünki olarnıñ afu etilüvi aqqında vesiqalar gizli qalmaqta. Bu azat etilgen şahıslar Rusiye tarafından ilhaq etilgen Qırımda taqip etile bileler, dep tahmin etti.
Advokat: «Qırımğa ketmek içün uquqiy statusnı tayin etmek kerek. Bu hususlar tayin etilmegence Qırımğa baruv belli bir zorluqlar ile qarşılaşa bile. Olarnı (Çiygoznı, Umerovnı – QA) cinaiy taqipqa oğrata bileler. Biz bu emirlerde neler yazılğanını yahşı bilemiz ki. Bu işte uquqiy azırlıq yapılmaq kerek. Biz tamam bunı yapamız», – dedi.
Advokatnıñ bildirgenine köre, Moskvadaki Tverskoy rayon mahkemesi Ahtem Çiygoz ve İlmi Umerovnıñ Rusiye prezidenti Vladimir Putinniñ memuriyetine qarşı eki memuriy davanı açmaqnı red etti. Olarnıñ maiyeti, Kremlniñ afu etüv aqqında emirleri boyunca malümat bermekni red etüv ile alâqalı edi.
2017 senesiniñ sentâbrinde Kremlniñ kontroli altında bulunğan Qırım Yuqarı mahkemesi Ahtem Çiygozğa 8 yıl koloniya cezasını tayin etti. O, 2014 senesi fevral 26-sında Qırım Yuqarı Radasınıñ binası ögünde Ukrainanıñ topraq bütünligine qol tutmaq maqsadınen ötkerilgen mitingde iştirak etkeni içün 2015 senesiniñ yanvarinde yaqalanğan edi. Çiygoz kütleviy qarışıqlıqlarnı teşkil etkeninde qabaatlandı.
Bundan soñ Qırımdaki mahkeme İlmi Umerovğa eki yıl koloniya-qasaba cezasını tayin etti. O, separatizmge açıq davette qabaatlandı.
Oktâbrniñ 25-nde Rusiye akimiyeti Umerov ile Çiygoznı azat etip, Türkiyege teslim etti. Daa sonra Qırımtatar Meclisiniñ azat etlgen liderleri Kyivge keldiler.
