Rusiye prezidentiniñ memuriyeti Qırım advokatı Edem Semedlâyevniñ, yarımadada mahküm etilgen Qırımtatar Milliy Meclisi reisiniñ muavini İlmi Umerovnıñ Qırımdan qaysı bir emir esasında çıqarılğanı aqqında malümat bermek ricasını red etti.
Bunı dekabrniñ 4-nde Facebookta vesiqanıñ kopiyasını derc etip, İlmi Umerov bildirdi. Onıñ aytqanına köre, Semedlâyevniñ bu ricasına cevap dekabr 1 cuma künü keldi.
«Teessüf ki, bir şey belli olmadı. Men ale daa nege esaslanıp «azat etilgen»imni ya da «bağışlanğan»ımnı, ya da «aqlanğan»ımnı, ya da «deñiştirilgen»imni, ya da «resmen afu etilgenim»ni bilmeyim… Asılında bu «emir» barmı, belki o, yoqtır ve men «qaçaq» oladırım? Amma o, olsa, onı maña ne içün tanıtmadılar?» – dep qayd etti Umerov.
2017 senesi noyabrniñ ortasında Qırım advokatı Edem Semedlâyev, imayesi altında bulunğan şahısnıñ aqları ve menfaatlarını qorçalamaq maqsadınen ariza yazıp, Qırımtatar Milliy Meclisi reisiniñ muavini İlmi Umerovnıñ Qırımdan qaysı bir emir esasında çıqarılğanını añlatmağa rica etti.
Qırımtatar Milliy Meclisi reisiniñ muavini İlmi Umerov Qırımda eki yıl koloniya-qasabada apis etilüv cezasına mahküm etildi. Ondan ğayrı oña eki yıl devamında cemiyet faaliyetinen oğraşmaq ve kütleviy haber vastalarında çıqışlar yapmaq yasaq etildi. Umerovnı açıq menbalarda yapılğan separatizmge çağıruvda qabaatladılar. O, özüne qarşı açılğan cinaiy işke, siyasiy maqsatlı iş dey.
Rusiye akimiyeti, İlmi Umerovnı ve Qırımda mahküm etilgen qırımtatar halqınıñ liderlerinden biri Ahtem Çiygoznı azat etip, oktâbrniñ 25-nde Türkiyege teslim etti. Daa soñra Umerovnen Çiygoz Kyivge keldiler.
