Qırımda mahkeme, yanvarniñ 25-nde Seyitler (Nijnöhirskıy) rayonınıñ Seyitler Vaqıf (Rozlıvı) köyünde yapılğan tintüvden soñ yaqalanğan Qırım musulmanı Ebazer İslâmovğa 2 biñ ruble (1023 hrivna – QA) miqdarında cöreme tayin etti. Bunı Facebookta «Qırım birdemligi» cemiyet birleşmesi bildire.
Faaliyetçiler, İslâmovnı Rusiyeniñ memuriy uquq bozuvları boyunca kodeksiniñ 20.3 maddesi (ekstrimistik teşkilâtlarınıñ atributları ya da simvolikasını propaganda etüv ya da açıq olaraq numayiş etüv) boyunca qabaatlaylar, dep iddia eteler.
Rusiye telükesizlik hadimleri yanvar 25 sabasında ilhaq etilgen Qırımnıñ Canköy ve Seyitler (Nijnöhirskıy) rayonlarında tintüvler yaptılar. Bundan soñ Canköy faaliyetçisi Enver Kroşnı şeerniñ rayon polis bölügine ve Seyitler Vaqıf (Rozlıvı) köyünde yaqalanğan Ebazer İslâmovnı Seyitler rayon polis bölügine ketirdiler.
Ebazer İslâmovnıñ yaqın dostları, onıñ din talaplarını eda etken musulman olğanını söylediler.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübheli tanılğan Qırım musulmanlarınıñ evlerinde ketken sayın daa sıq surette tintüvler yapıla.
