Cayköyde tintüvden soñ yaqalanğan qırımtatar faaliyetçisi Enver Kroşnı Rusiye kodeksiniñ 20.3 maddesi 1-nci qısmı (ekstrimistik teşkilâtlarnıñ atributları ya da simvolikasını propaganda etüv ya da açıq olaraq numayiş etüv) boyunca memuriy uquq buzuvında qabaatlaylar.
Bunı, Rusiyege tabi Canköy rayon mahkemesinden Qırım.Aqiqat muhbiri bildire.
«Qırım birdemligi» faaliyetçileriniñ bildirgenine köre, faaliyetçiniñ qorçalayıcıları oturışuvnıñ videyo ve fotoğa çıqarıluvı, büyük zalnıñ ayırıluvı ve işniñ materiallarınen tanış oluv boyunca muracaat ettiler.
Rusiye telükesizlik hadimleri yanvar 25 sabasında ilhaq etilgen Qırımnıñ Canköy ve Seyitler (Nijnöhirskıy) rayonlarında tintüvler yaptılar. Bundan soñ Canköy faaliyetçisi Enver Kroşnı şeerniñ rayon polis bölügine ve Seyitler Vaqıf (Rozlıvı) köyünde yaqalanğan Ebazer İslâmovnı Seyitler rayon polis bölügine ketirdiler.
Faaliyetçiler, Kroştan telefon, planşet ve noutbuk musadere etilgenini bildirdiler.
Rusiye telükesizlik strukturalarınıñ saifelerinde tintüvler aqqında malümatlar yoq.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübheli tanılğan Qırım musulmanlarınıñ evlerinde ketken sayın daa sıq surette tintüvler yapıla.
