Qırımda tevqif etilgen «Veciye Kaşka işi» figurantı Kâzim Ametov bir qaç kün qanunsız olaraq apiste buluna. Bunı yanvarniñ 17-sinde Qırım.Aqiqat içün bergen izaatta advokat Emil Kurbedinov söyledi.
Kubedinov: «Bir qaç kün evel mahkeme oturışuvı oldı. Oña «Veciye Kaşka işi» boyunca dörtünü (Kâzim Ametov, Asan Çapuh, Ruslan Trubaç ve Bekir Degermenci – QA) de ketirdiler. Akem (tevqif muddetiniñ uzatılması aqqında – QA) qarar çıqardı, amma anda imayem altında bulunğan Ametov Kâzim aqqında söz yürütilmey. Anda şahsiy malümatları farqlı olğan başqa bir kişi aqqında aytıla. Yanvarniñ 15-nde sıñırlav tedbiriniñ muddeti soñuna yetti. Bundan soñ tahqiqat izolâtorınıñ müdiri insannı azat etmege mecburdır», – dep añlattı.
Advokatnıñ aytqanına köre, o, Kremlniñ kontroli altında bulunğan Aqmescitteki tahqiqat izolâtorı, Cezalarnı icra etüv federal hizmeti ve Qırım prokuraturasına imayesi altında bulunğan şahısnı deral azat etmek talabınen arizalar yolladı.
Yanvar 12 cuma künü Kremlniñ kontroli altında bulunğan Aqmescitteki Kyiv rayonı mahkemesi «Veciye Kaşka işi» figurantlarınıñ tevqif muddetini eki ayğa uzattı.
2017 senesi noyabrniñ 23-nde Aqmescitte Rusiye telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olar Türkiye vatandaşından «aqsız yerde hususan büyük miqdarda para talap etüv»de qabaatlanalar. Rusiye telükesizlik hadimleri tarafından yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apis etti.
