Link açıqlığı

Kremlniñ kontroli altında bulunğan Qırım muftisi Emirali Ablayev, Vladimir Putinniñ Rusiye prezidenti saylavına namzet kösterilmesine qol tutqan imzanı attı. Bunı yanvarniñ 13-nde Qırımnıñ kütleviy haber vastaları bildire.

Qırımnıñ Rusiyege tabi akimiyetine yaqın olğan «Krıminform» saytı, Emirali Ablayevniñ, «keçken 15 yılnen qıyaslağanda soñki üç yıl içinde (Qırımda – QA) üç qaç ziyade iş yapıldı», degenini bildire.

RİA Krım bildirgeni kibi, ilhaq etilgen Qırımdan Rusiye Devlet dumasınıñ deputatı olğan Ruslan Balbek de şimdiki prezidentniñ saylavğa namzet olaraq kösterilmesine qol tutqan imzanı atmaq içün keldi. O, bunı neşir içün izalap, Putinge «milliy lider» dedi.

Neşir, Rusiyeniñ tarafını tutqan «Qırım birligi» qırımtatar teşkilâtınıñ azaları da Putinge qol tuttılar, dep bildire.

Rusiye ve ilhaq etilgen Qırımda, daa evel nevbetteki prezidentlik muddetine namzetini özü köstergen olaraq saylavda iştirak etecegini bildirgen Rusiye prezidenti Vladimir Putinge qol tutmaq içün imzalar toplana. Bu ülkede öz-özüni namzet köstergen şahısnı qayd etmek içün rey berüv aqqına saip olğan saylavcılardan eñ az 300 biñ imzanı toplamaq kerek.

Rusiye prezidentiniñ saylavı (birinci tur) martnıñ 18-nde yapılmaq kerek – 2014 senesinde bu künde Rusiye Ukrainağa ait olğan Qırımnıñ öz topraqları sırasına «kirgeni» aqqında qanunsız olaraq ilân etti. Tahminlerge köre bu, Vladimir Putinniñ saylavdaki köstergiçlerini daa ziyade yükseltmek içün yapıldı, çünki Qırımnıñ zapt etilmesini onıñ eñ muim qazançı olaraq köstereler.

Tahminlerge köre, 65 yaşlı Putin saylavda büyük bir farq ile artıq birinci turda yeñecek, ve onıñ içün dörtünci olğan altı yıllıq muddetke başlaycaq. Asılında o, 1999 senesi dekabrniñ 31-nde sabıq prezident Boris Yeltsin istifa etken soñ, Rusiyeni endi 17 yıldan berli idare ete. Aynı zamanda, 2008 – 2012 yılları arasında, safdaşı Dmitriy Medvedev prezident olğanda, Putin Rusiyeniñ baş naziri edi.

XS
SM
MD
LG