Çin iş adamları Rusiye tarafından ilhaq etilgen Qırımda pamidor, patılcan, hıyar, havuç, sarımsaq, qavun, qarpuz ve yer yemişlerini östürmek içün 600 million ruble (277 million hrivna – QA) yatırmağa azır olğanlarını ifade ettiler. Bunı bir kün evel Kremlniñ kontroli altında bulunğan Qırım Köy iqtisadiyatı nazirligi, muessiseniñ rehberi Andrey Rümşinniñ «çinli yatırımcılar» ile körüşüv neticelerine esaslanıp, bildirdi.
Bildirüvde: «Añlaşmalar yapılsa, sera (teplitsa) kompleksleriniñ qurucılığı bir yıl içinde başlanacaq. Çin tarafı bütün ekologik ve Rusiye qanunlarındaki köy iqtisadiyatınıñ mahsullarını yetiştirüvge dair diger talaplarğa riayet etmege azır. Çetel yatırımcılarnıñ aytqanlarına köre, leyhağa yerli iş küçü celp etilecek», – denile.
Nazirlikniñ bildirgenine köre, Rümşin, Çin seralarınıñ işke qoyulması Seyitler (Nijnegorskiy) rayonınıñ sakinleri içün qoşma iş yerlerini yaratacaq, dedi.
2017 senesiniñ noyabrinde Qırım Kurortlar ve turizm nazirligi, «vizasız turistik yolculıqlar» çerçivesinde Çinden turistlerni qabul etmek içün yerli turistik operatorlarnıñ cedvelini azırlağanını bildirdi.
Daa soñra Ukraina prezidenti Petro Poroşenko Çinniñ resmiy akimiyetini «Qırımnıñ Rusiye tarafından vaqtınca işğal etilgenini tanımama siyasetine riayet etmege» davet etti.
Yarımadanıñ Rusiyege tabi akimiyeti, Qırımğa çetel vatandaşlarnı davet etip, onıñ ilhaqını qanuniyleştirecek olalar.
Ukraina Tış işleri nazirligi er daim çetel vatandaşlarnı ve vatandaşlığı olmağan şahıslarnı Rusiye tarafından ilhaq etilgen Qırımğa yalıñız Ukrainanıñ qanunları ve halqara normalarına muvafıq olaraq kirmege davet ete.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
