Qırımtatar faaliyetçisi, «Veciye Kaşka işi»niñ figurantı Asan Çapuh «stabil-qanaatlendirici» vaziette buluna, lâkin sağlığınıñ vaziyeti endişe doğurğanı içün Çapuhnı ekim tarafından teşkerilmesi içün hastahanege alıp baracaq olalar. Bunı yanvarniñ 12-sinde Qırım.Aqiqatqa qabaatlanğannıñ advokatı Ayder Azamatov dedi.
Advokat: «Onıñ vaziyeti şimdilik stabil-qanaatlendirici. O, özü azaçıq yüre bile, lâkin yalıñız adamlarnıñ yardımınen. O, sol ayağını şimdilik duymağanını ayttı, qolu boyunca da nasıldır endişeleri bar. Yanvarniñ 18-nde onı qoşma (tıbbiy – QA) teşkerüvge alıp baracaq olalar», – dedi.
Azamatovnıñ aytqanına köre, onıñ sağlıq vaziyeti boyunca vesiqalarnı almaq içün o, bir qaç malümat talabı yolladı.
O: «Tahqiqat izolâtorından alğan mektübimde, alıp barılğan hastahaneniñ tıbbiy hadimleri oña tahqiqat izolâtorı şaraitlerinde tedaviylenmege tevsiye ettiler, dep bildirile. Böyle tevsiye oldımı, yoqmı, neticeler nasıl edi, men bilmeyim. Bu mesele boyunca men tünevin (yanvar 11 künü – QA) hastahanege ve tahqiqat izolâtorına advokat talabı yolladım», – dep ilâve etti.
Yanvar 12 cuma künü Kremlniñ kontroli altında bulunğan Aqmescitteki Kyiv rayonı mahkemesi «Veciye Kaşka işi» figurantlarına apis muddetini eki ayğa uzattı.
Dekabrniñ 28-nde Aqmescitteki Semaşko adına hastahanede qırımtatar faaliyetçisi, «Veciye Kaşka işi» figurantı Asan Çapuhnıñ tıbbiy teşkerilüvi yapıldı. Ekimlerniñ hulâsası yılbaşı bayramlarından soñ beklenile.
65 yaşlı qırımtatar faaliyetçisi Asan Çapuh tahqiqat izolâtorında mikroinsult keçirdi ve acele surette hastahanege yatqızılmasına muhtac edi. Onıñ advokatı Ayder Azamatov imayesi altında bulunğannı şeer hastahanesine avuştırılmasını talap ete edi.
Noyabrniñ 23-nde Aqmescitte Rusiye telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olarnı Türkiye vatandaşından «aqsız yerde hususan büyük miqdarda para talap etüv»de qabaatlaylar. Rusiye telükesizlik hadimleri tarafından yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apis etti.
