Link açıqlığı

Kefede mahkeme qırımtatarlarğa qol tutmaq maqsadınen yapılğan bir kişilik piketleriniñ daa bir iştirakçisine cöreme tayin etti


Kremlniñ kontroli altında bulunğan Kefe şeer mahkemesi qırımtatarlar, musulmanlarnıñ tintüvleri ve tevqiflerine qarşı yapılğan bir kişilik piketlerniñ daa bir iştirakçisi, Rustem Mustafayevge 10 biñ ruble (qararnen 4,9 biñ hrivna – QA) miqdarda cöreme tayin etti.

Qırım.Aqiqat muhbiriniñ bildirgenine köre, piket oktâbrniñ 14-nde yapılsa da, cöremege çarptırılğan faaliyetçiden maddiy delillerni musadere etüv aqqında protokolda «oktâbr 13» tarihı yazıldı. Ondan ğayrı, Rusiye polis memurı, piket iştirakçilerine qarşı tizilgen memuriy protokollarğa, yañılıp, «doquz şişe raqınıñ musadere etilgeni aqqında» malümatnı kirsetti.

ВEpisi olıp, yanvarniñ 12-sinde Kefedeki mahkeme 2017 senesi oktâbrniñ 14-nde ilhaq etilgen Qırımnıñ farqlı bölgelerinde keçken bir kişilik piketlerniñ eki iştirakçisine cöremeler tayin etti. Qalğan üç piket iştirakçisi boyunca oturışuvlar mahkeme tarafından yanvarniñ 15-ne avuştırıldı (eki oturışuv saat 11:00-ge ve daa biri saat 15:00-ke tayin etildiler).

Oktâbrniñ 14-nde yarımadada telükesizlik hadimleriniñ qırımtatarlar, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi. Daa soñra Rusiye mahkemeleri bu piketlerniñ iştirakçilerine cöremeler tayin etti.

Piket iştirakçilerine qarşı, piket ötkerilmesiniñ tayin etilgen tertibini bozğanları içün (Rusiyeniñ Memuriy tertip bozuv aqqında kodeksi, 20.2 maddesiniñ 5-nci qısmı) memuriy protokollar tizildi.

Daa soñra Aqmescit, Canköy, Aluşta, Suvdağ şeerlerinde ve bunıñ kibi de İçki, İslâm-Terek, Qarasuvbazar ve Qurman rayonlarında mahkeme oturışuvları ötkerildi. İçki işler nazirliginiñ Qırım boyunca ekspertiza merkezi tarafından «piketler umumiy maqsat, niyet ve teşkil etilüv ile birleştirilgen» şeklinde berilgen hulâsa, qabaatlav tarafınıñ esas delili oldı.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG