Kremlniñ kontroli altında bulunğan Kefe şeer mahkemesi qırımtatarlar, musulmanlarda yapılğan tintüvler ve tevqiflerge qarşı narazılıq köstermek maqsadınen yapılğan bir kişilik piketniñ iştirakçisi Enver Mustafayevge 10 biñ ruble (qararnen 5 biñ hrivna – QA) miqdarında cöreme tayin etti.
Qırım.Aqiqat muhbiriniñ bildirgenine köre, bundan evel planlaştırılğan Kefe mahkemesiniñ daa dört faaliyetçige cöremelerni tayin etüv boyunca oturışuvları yanvar 12 künü saat 14-ten (Kyivniñ vaqtı boyunca 13-ten – QA) soñ başlanacaqlar.
Oktâbrniñ 14-nde yarımadada telükesizlik hadimleriniñ qırımtatarlarğa, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi. Daa soñra Rusiye mahkemeleri bu piketlerniñ iştirakçilerine cöremeler tayin etti.
Piket iştirakçilerine qarşı, piket ötkerilmesiniñ tayin etilgen tertibini bozğanları içün (Rusiyeniñ Memuriy tertip bozuv aqqında kodeksi, 20.2 maddesiniñ 5-nci qısmı) memuriy protokollar tizildi.
Daa soñra Aqmescit, Canköy, Aluşta, Suvdağ şeerlerinde ve bunıñ kibi de İçki, İslâm-Terek, Qarasuvbazar ve Qurman rayonlarında mahkeme oturışuvları ötkerildi. İçki işler nazirliginiñ Qırım boyunca ekspertiza merkezi tarafından «piketler umumiy maqsat, niyet ve teşkil etilüv ile birleştirilgen» şeklinde berilgen hulâsa, qabaatlav tarafınıñ esas delili oldı.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
