Link açıqlığı

Saatnıñ esas haberi

Rusiye Qırımdan tehnikanı qaytarmaq niyetinde degil – Ukraina Ordunı tetqiq etüv merkeziniñ eksperti


Ukraina Ordu, konversiya ve silâsızlanuvnı tetqiq etüv merkeziniñ eksperti Anton Mihnenko, Rusiyeniñ ilhaq etilgen Qırımnıñ territoriyasında qalğan Ukrainanıñ arbiy tehnikasını qaytarmaq niyetinde olmağanını tüşüne. Ekspert bu fikirni Qırım.Aqiqat içün bergen izaatta ifade etti.

Aytqanına köre, Rusiye prezidenti Vladimir Putinniñ Ukrainağa ait arbiy tehnikanı Qırımdan alıp bermek imkânı olğanı aqqında beyanatı – «cemiyetniñ diqqatını başqa şeylerden bu meselege çekmek içün siyasiy ayin-oyunlardır».

Mihnenko: «Olar zapt etilgen gemilerni qaytarmaq niyetinde degiller. Anda olarnı endi tamir ete ve qanunsız tarzda qullanalar. Amma er şeyge rağmen bu yapılsa bile, bu tehnikanı nasıl vaziyette qaytarğanlarını biz pek yahşı bilemiz. Hatırlatmaq isteyim ki, olar bizge endi avto ve zırhlı tehnikanı qaytardılar. Lâkin anda parçalar yetişmey, köçüricileri parçalanğan, tertibatlar tübü-tamırınen sökülip alınğan edi», – dep qayd etti.

Ekspert, ilhaq etilgen Qırım territoriyasında qalğan arbiy yedekler, olarnıñ havfsızlığı ve utilizatsiyası içün işğalci devlet cevapkâr olğanını hatırlattı.

Yanvarnıñ 11-nde, aqşam, Rusiye presidenti Vladimir Putin, Rusiyeniñ Ukrainağa ilhaq etilgen Qırımdan arbiy tehnikasını qaytarmağa azır olğanını bildirdi.

2017 senesiniñ dekabrinde sabıq Ukraina halq deputatı Andrey Sençenko, 2014 senesinde, Qırımnıñ Rusiye tarafından ilhaq etilmesi esnasında, yarımadadan silâlarnıñ çıqarılması ve arbiy hadimlerniñ qorantaları ile kursantlarnıñ evakuatsiya etilmesi aqqında muzakereler etkenini söylegen edi. Onıñ aytqanına köre, o, 3502 miqdarda arbiy tehnika ve silânıñ çıqarılmasını temin etti. Olarnıñ soñki qısmı 2014 senesi iyünniñ 16-sında yüklenip çıqarılğan edi.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG