Qırım Muhtar Cumhuriyeti prokuraturası Qırım sakinlerini Rusiye ordusında hizmet etmege mecbur etüv vaqiaları boyunca deliller toplay. Rusiye tarafından Ukraina vatandaşlarını askerlikke aluv ve orduda hizmetni red etmeleri taqdirde olarğa qarşı mahkeme davalarını açuv, arbiy cinayetler olıp, olarğa Halqara cinaiy mahkemeniñ yurisdiktsiyası kenişletile. Bunı Qırım.Aqiqatqa muessiseniñ matbuat kâtibi Tetâna Tıhonçık ikâye etti.
O: «Bugünge qadar operativ areketler neticesinde işğal etilgen Qırım sakinlerine yollanğan povestkalarınıñ originalları elde etildi, bir sıra şaat sorğulandı», – deye tafsilatlar bildirdi ve toplanğan malümat Halqara cinaiy mahkemege yollanacaq, dep ilâve etti.
Cinaiy işniñ materiallarinda, Qırım sakinlerini qanunsız olaraq Rusiye ordusına askerlikke aluv aqqında Qırım aq-uquq qorçalayıcıları grubunıñ malümatı da yer almaqta. Aq-uquq qorçalayıcıları, üç yıl zarfında Rusiyeniñ arbiy hizmetine 10 biñge yaqın Ukraina vatandaşı olğan Qırım sakini çağırıldı, dep qayd eteler.
Rusiye Mudafaa nazirliginiñ bildirgenine köre, ilhaq etilgen Qırımnıñ arbiy komissariatı noyabrniñ 16-sında «2017 küz» çağırıluvından 103 arbiy hadimni Rusiye ordusınaki hizmetke yolladı.
Qırım aq-uquq qorçalayıcıları grubu Qırım sakinlerine, ilhaq etilgen yarımadanıñ territoriyasından Rusiye ordusına muddetli hizmetke çağırıluv vaqiaları aqqında bildirmek ricasınen muracaat etti.
Qırımnıñ ilhaqından soñ Rusiye akimiyeti Qırım sakinlerini öz ordusınıñ saflarına askerlikke alalar. Yarımadada bir çoq kütleviy tedbirlerde Rusiye Silâlı quvetlerinde hizmet etüv teşviqatı yapıla. Halqara qanunları ve BMT Baş Assambleyasınıñ qararlarına baqmadan Qırım sakinlerini Rusiye ordusına hizmetke kirmege davet eteler.
