Link açıqlığı

Saatnıñ esas haberi

Üç yıl içinde 10 biñge yaqın Qırım sakini Rusiye ordusına çağırıldı – aq-uquq qorçalayıcıları


Aqyarda orduğa çağırılğan gençler, 2017 senesiniñ dekabr ayı
Aqyarda orduğa çağırılğan gençler, 2017 senesiniñ dekabr ayı

Üç yıl içinde 10 biñge yaqın Qırım sakini Rusiye ordusına çağırıldı. Bunı Qırım aq-uquq qorçalayıcı grubunıñ esabatında derc etilgen malümat tasdiqlay.

Esabatta: «2017 senesinde Rusiye ordusına çağırılğan Qırım sakinleriniñ sayısı bayağı arttı. 2016 senesinde olarnıñ sayıları 3100 kişi olsa, 2017 senesinde Rusiyeniñ ordusına Qırımdan endi aman-aman 5000 gençni yolladılar. Umumen işğal esnasında Rusiye Silâlı quvetlerine qararnen 10 biñ Qırım sakini çağırıldı», – denile.

Ondan ğayrı, aq-uquq qorçalayıcıları, 2017 senesinde orduda hizmet etmekten qaçınuv içün qararnen dört cinaiy işniñ açılğanını qayd eteler. Eki iş Aqmescitte, bir iş Aqyarda ve bir iş Yaltada. Malümatqa köre, olarnıñ üçü boyunca endi mahkeme qararları çıqarıldı.

Rusiye Mudafaa nazirliginiñ bildirgenine köre, ilhaq etilgen Qırımnıñ arbiy komissariatı noyabrniñ 16-sında «2017 küz» çağırıluvından 103 arbiy hadimni Rusiye ordusınaki hizmetke yolladı.

Qırım aq-uquq qorçalayıcıları grubu Qırım sakinlerine, ilhaq etilgen yarımadanıñ territoriyasından Rusiye ordusına muddetli hizmetke çağırıluv vaqiaları aqqında bildirmek ricasınen muracaat etti.

Qırımnıñ ilhaqından soñ Rusiye akimiyeti Qırım sakinlerini öz ordusınıñ saflarına toplap alalar. Yarımadada bir çoq kütleviy tedbirlerde Rusiye Silâlı quvetlerinde hizmet etüv teşviqatı yapıla. Halqara qanunları ve BMT Baş Assambleyasınıñ qararlarına baqmadan Qırım sakinlerini Rusiye ordusına hizmetke kirmege davet eteler.

XS
SM
MD
LG