Link açıqlığı

Ukrainada devlet içinde mecburen köçken şahıslarnıñ sayısı eksildi


Yanvarniñ 9-ndaki vaziyetke köre, Ukrainada devlet içinde mecburen köçken 1 million 492 biñ 100 şahıs resmen qayd etildi. Bunı Ukrainanıñ İçtimaiy siyaset nazirligi bildire.

Yanvar 9 salı künü İçtimaiy siyaset nazirliginiñ matbuat hizmeti tarafından yapılğan bildirüvde: «Vilâyetler ve Kyiv şeer devlet memuriyetiniñ strukturalarındaki ealiniñ içtimaiy qorçalavı şubeleriniñ malümatına köre, Donbass ile Qırımdan mecburen köçken 1 million 492 biñ 100 şahıs ya da 1 million 219 biñ qoranta resmen qayd etildi», – denile.

Bunıñnen birlikte dekabr ayında Ukrainada qayd etilgen mecburen köçken şahıslarnıñ sayısı bir qaç biñ daa ziyade edi.

2017 senesi dekabrniñ 18-ndeki vaziyetke köre, Ukrainada ilhaq etilgen Qırım ve Ukrainanıñ kontroli altında olmağan Donbass territoriyalarından mecburen köçken 1 492 125 şahıs resmen qayd etildi. Bu malümatnı, Ukrainanıñ İçtimaiy siyaset nazirligine esaslanıp, Ukrainanıñ Poloniyadaki elçiligi bildirdi.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG