2017 senesi dekabrniñ 18-ndeki vaziyetke köre, Ukrainada ilhaq etilgen Qırım ve Ukrainanıñ kontroli altında olmağan Donbass territoriyalarından devlet içinde mecburen köçken 1 492 125 şahıs resmen qayd etildi. Bunı Ukrainanıñ Poloniyadaki elçiligi, Ukraina İçtimaiy siyaset nazirliginiñ malümatına esaslanıp, bildire.
Ukrainada BMTniñ hümanitar operatsiyaları koordinatorı Nil Uokerniñ malümatına binaen Ukraina, devlet içinde mecburen köçken şahıslarnıñ sayısına köre, dünyada 9-ncı yerde buluna.
Daa evel Ukraina Tış işleri nazirligi, Ukrainağa qarşı tecavuzı ve bu cümleden Qırım ilhaqınıñ neticeleri sebebinden Rusiye ve onıñ eñ yuqarı rehberleri içün «cezalav qaçınılmaz» olğanını beyan etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp devletleri oña qarşı bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
