Link açıqlığı

Mamedov: QMC Prokuraturası Qırım boyunca halqara mahkemesini, Nürnberg mahkemesinden örnek alıp başlatacaq


QMC prokurorı Gündüz Mamedov

QMC prokurorı Gündüz Mamedov, QMC Prokuraturasınıñ Qırım boyunca halqara mahkemesini, Nürnberg mahkemesinden örnek alıp başlatmaq istegenini bildirdi. QMC Prokuraturasınıñ matbuat hizmeti noyabrniñ 20-sinde prokurornıñ beyanatını iqtibas ete.

«Yalıñız becergenler degil, aynı zamanda buyurğanlar da yapqanları içün cevap bermek kerekler», – dedi prokuror.

Onıñ aytqanına köre, 2017 senesiniñ başında o, prokuratura hadimleri ögünde «İşğalciler tarafından Qırım yarımadasında işlengen arbiy cinayetler yani insanlıqqa qarşı cinayetler, genotsid ile alâqalı vaqialarnıñ Halqara cinaiy mahkemesinde baqılması içün bütün kerekli delillerni toplamaq» vazifesini qoydı.

«Bugünki künde mustaqil aq-uquq qoruyıcı cemiyet teşkilâtlarınen birlikte ilk tanıtıcı bildirüv azırlanıp, tezden Halqara cinaiy mahkemesine yollanılacaq. Daa bir tanıtıcı bildirüv bitirilmek üzredir», – denile matbuat hizmetiniñ bidirüvinde.

Gündüz Mamedov: «Qırımda işlenmekte olğan cinayetlerniñ Gaagada tahqiq etilmege başlaycağına doğru qatiy adımlar atqanımızda samimiy olaraq işandıra bilem ve Nürnberg mahkemesine beñzegen bir mahkeme yapılacağına ümüt etem», – dedi.

QMC Prokuraturasında hatırlattılar ki, 1945 senesi noyabrniñ 20-sinde Nürnbergdeki Halqara arbiy tribunalında mahkeme davasınıñ baqılması başlağanından 72 yıl keçti ve o, «baqılması esnasında qanun ve uquq arasında muayyen bir sıñır çizgisi sızılğan birinci mahkeme davası edi».

2017 senesi iyulniñ 22-sınde Ukraina Telükesizlik hizmetiniñ yolbaşçısı Vasyl Grytsak, Ukraina tarafından Rusiyeniñ Donbass ve Qırımdaki tecavuzını isbatlağan delillerniñ Gaagadaki BMT Halqara mahkemesine teslim etilgenini bildirdi.

Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko munasip qanunnı imzaladı. Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.

XS
SM
MD
LG