Link açıqlığı

Saatnıñ esas haberi

Putin sanktsiyalarına oğrağan qırımlılarnıñ adları belli oldı


Rusiye sanktsiya cedveline Qırım siyasetçileri, arbiyleri, ukrain müessiselerniñ hadimleri oğradı.

Noyabrniñ 1-inde derc etilgen vesiqağa köre, Rusiyeniñ iqdisadiy sanktsiyalarına, Qırım MC-de Ukrainanıñ daimiy vekiliniñ muavini İzet Gdanov, Qırım MC akimiyetiniñ sabıq reisi, Ukraina halq mebusı Sergey Kunitsin, Ukrainanıñ vaqtınca işğal etilgen topraqları meseleleri boyunca nazirniñ birinci muavini Yusuf Kurkçi, Qırım MC-niñ reis muavini Andrey Sençenko oğradı.

Sanktsiya cedvekinde Qırım MC-de Ukrainanıñ daimiy vekili Boris Babin, Qırım MC-niñ prokurorı Gündüz Mamedov, Ukraina halq mebusı Yuriy Mamçur da kirsetildi.

Qırım.Aqiqat, yuqarıda añılğan insanlarnıñ Rusiye ükümetiniñ qararınen bağlı izaatlarını almağa tırışa.

Bundan ğayrı, Rusiye ükümeti, qırımtatar halqınıñ lideri Mustafa Cemilev ve Qırımtatar Milliy Meclisiniñ reisi Refat Çubarovğa qarşı şahsiy iqtisadiy sanktsiyalar kirsetti. Bu aqta Rusiye ükümetiniñ 2018 senesi oktâbrniñ 22-nde qabul etilgen qararda aytıla.

Haber etile ki, sanktsiyalar naqıtsız sermiyanı, vesiqalaştırılmağan qıymetli kâğıtlarnı ve Rusiyedeki mal-mülkni blok etip, olğan paralarnı Rusiye tışına çıqarılmasını yasaq ete.

Umumen Rusiye ükümeti 322 Ukraina vatandaşı ve 68 ukrain şirketine qarşı sanktsiyalar kirsetti. Olar oktâbrniñ 22-nde işke tüşürildi.

Rusiye prezidenti Vladimir Putin «Ukrainanıñ Rusiye Federatsiyasınıñ vatandaşları ve şirketlerine qarşı yapqan duşmanlıq areketleri sebebinden mahsus iqtisadiy tedbirler alınmasına dair» fermannı imzalağan edi.

Putin akimiyetke, sanktsiyalarğa oğraycaq şahıs ve şirketlerniñ cedvelini tizip, sıñırlayıcı tedbirlerni belgilemege avale etken edi.

Bu sene mayıs ayında Ukraina milliy havfsızlıq ve mudafaa şurası Rusiyege qarşı sanktsiyalarnı kenişletip, 30 şirket ve 14 şahısqa qarşı sıñırlanuv tedbirini almağa qarar bergen edi. Prezident Petro Poroşenko fermannı imzaladı. Böylece, al-azırda sanktsiyalar cedvelinde 1762 şahıs ve 786 şirket bar.

XS
SM
MD
LG