Rusiye ükümeti, qırımtatar halqınıñ lideri Mustafa Cemilev ve Qırımtatar Milliy Meclisiniñ reisi Refat Çubarovğa qarşı şahsiy iqtisadiy sanktsiyalar kirsetti. Bu aqta Rusiye ükümetiniñ 2018 senesi oktâbrniñ 22-nde qabul etilgen qararda aytıla.
Haber etile ki, sanktsiyalar naqıtsız sermiyanı, vesiqalaştırılmağan qıymetli kâğıtlarnı ve Rusiyedeki mal-mülkni blok etip, olğan paralarnı Rusiye tışına çıqarılmasını yasaq ete.
Qırım.Aqiqat, Cemilev ve Çubarovnıñ Rusiye ükümetiniñ qararınen bağlı izaatlarını almağa tırışa.
Umumen Rusiye ükümeti 322 Ukraina vatandaşı ve 68 Ukraina şirketine qarşı sanktsiyalar kirsetti. Olar oktâbrniñ 22-nde işke tüşürildi.
Rusiye prezidenti Vladimir Putin «Ukrainanıñ Rusiye Federatsiyasınıñ vatandaşları ve şirketlerine qarşı yapqan duşmanlıq areketleri sebebinden mahsus iqtisadiy tedbirler alınmasına dair» fermannı imzalağan edi.
Ükümet reisi Dmitriy Medvedev sanktsiyalarğa oğraycaq şahıs ve şirketlerniñ cedvelini tizip, alınacaq tedbirlerni belgilemege avale etken edi.
Bu sene mayıs ayında Ukraina milliy havfsızlıq ve mudafaa şurası Rusiyege qarşı sanktsiyalarnı kenişletip, 30 şirket ve 14 şahısqa qarşı sıñırlanuv tedbirini almağa qarar bergen edi. Prezident Petro Poroşenko fermannı imzaladı. Böylece, al-azırda sanktsiyalar cedvelinde 1762 şahıs ve 784 şirket bar.
