Rusiye prezidenti Vladimir Putin Ukrainağa qarşı iqtisadiy sanktsiyalar kirsetme fermanını imzaladı. Böyle bir qarar oktâbrniñ 22-nde Kreml saytında aydınlatıldı.
Qararda aytıla ki, sanktsiyalar «Ukrainanıñ Rusiye vatandaşları ve şirketlerine qarşı duşmanlıq ve halqara uquqqa zıt kelgen areketlerine cevap olaraq Rusiyeniñ milliy menfaatlarını qorumaq içün» kirsetile. Putin Rusiye ükümetine sanktsiyalarğa oğraycaq şahıs ve şirketlerniñ cedvelini tizmege ve bu sıñırlav tedbirlerini belgilemege emir etti.
Haberde aytılğanına köre, ferman imzalanğan künü işke tüşürile – oktâbrniñ 22-nde, amma Kyiv Rusiye vatandaşları ve şirketlerine qarşı sanktsiyalardan vazgeçse, lâğu etile bile.
İyül ayında Kreml Ukrainanıñ areketlerine cevap olaraq yüzlernen Ukraina vatandaşı ve şirketini yañı sanktsiyalar cedveline kirsetmege vade etken edi.
Bu sene mayıs ayında Ukrainanıñ milliy havfsızlıq ve mudafaa şurası Rusiyege qarşı sanktsiyalarnı kenişletmege ve 30 şirket ve 14 şahısqa qarşı sıñırlav tedbirini kirsetmege qarar aldı. Daa soñra prezident Petro Poroşenko bu qararnı işke tüşürtti. Böylece, al-azırda sanktsiyalar cedvelinde 1762 şahıs ve 786 şirket mevcut.
