Qırımtatar halqınıñ lideri Mustafa Cemilev, oña qarşı şahsiy sanktsiyalarını kirsetmek Rusiye akimiyetiniñ qararını “yubileyine yahşı bir bahşış” dep adlandırdı. Bu aqta o noyabr 1-inde Qırım.Aqiqatqa bergen tefsirde ayttı.
“Bu aqiqiy sandıraq. Bu 322 adamnıñ episi - Rusiye tecavuzına eñ faal qarşılıq köstergenler olğanını közde tutsaq, demek bunı kompliment kibi qabul etmek kerektir. Bu Rusiye imperializmine qarşı bir issedir. Menimce, bu yaqın vaqıtta olacaq yubeleyime yahşı bir bahşıştır (noyabr 13-te Mustafa Cemilev 75 yaşını tolduracaq - Q.A.)”, - dedi Cemilev.
Noyabrniñ 1-inde derc etilgen vesiqağa köre, Rusiyeniñ iqdisadiy sanktsiyalarına, Qırım MC-de Ukrainanıñ daimiy vekiliniñ muavini İzet Gdanov, Qırım MC akimiyetiniñ sabıq reisi, Ukraina halq mebusı Sergey Kunitsin, Ukrainanıñ vaqtınca işğal etilgen topraqları meseleleri boyunca nazirniñ birinci muavini Yusuf Kurkçi, Qırım MC-niñ reis muavini Andrey Sençenko, Qırım MC-de Ukrainanıñ daimiy vekili Boris Babin, Qırım MC-niñ prokurorı Gündüz Mamedov, Ukraina halq mebusı Yuriy Mamçur ve başqaları oğradı.
Bundan ğayrı, Rusiye ükümeti, qırımtatar halqınıñ lideri Mustafa Cemilevge qarşı şahsiy iqtisadiy sanktsiyalar kirsetti.
Haber etile ki, sanktsiyalar naqıtsız sermiyanı, vesiqalaştırılmağan qıymetli kâğıtlarnı ve Rusiyedeki mal-mülkni blok etip, olğan paralarnı Rusiye tışına çıqarılmasını yasaq ete.
Umumen Rusiye ükümeti 322 Ukraina vatandaşı ve 68 ukrain şirketine qarşı sanktsiyalar kirsetti. Olar oktâbrniñ 22-nde işke tüşürildi.
Rusiye prezidenti Vladimir Putin «Ukrainanıñ Rusiye Federatsiyasınıñ vatandaşları ve şirketlerine qarşı yapqan duşmanlıq areketleri sebebinden mahsus iqtisadiy tedbirler alınmasına dair» fermannı imzalağan edi.
Putin akimiyetke, sanktsiyalarğa oğraycaq şahıs ve şirketlerniñ cedvelini tizip, sıñırlayıcı tedbirlerni belgilemege avale etken edi.
Bu sene mayıs ayında Ukraina milliy havfsızlıq ve mudafaa şurası Rusiyege qarşı sanktsiyalarnı kenişletip, 30 şirket ve 14 şahısqa qarşı sıñırlanuv tedbirini almağa qarar bergen edi. Prezident Petro Poroşenko fermannı imzaladı. Böylece, al-azırda sanktsiyalar cedvelinde 1762 şahıs ve 786 şirket bar.
