Aqyarnıñ 7-nci gimnaziyasında Rosgvardiya hadimleri, talebelerge fevqulâde vaziyetinde havfsızlıq dersini berdi. Bu aqta Rosgardiya matbuat hızmeti haber etmekte.
“Derste küç organlarnıñ hadimleri balalarnen beraber, tecavuzcılarnıñ qorqutuvı taqdirinde areket tarzını ve sağlıq ve ömür qorçalavı içün ihtiyat tedbirlerinitekrarladı, ve zemaneviy rusiye tarihından facialı misallerni hatırladı”, - dep aytıla beyanatta.
Müessiseniñ malümatına köre, yaslar, böyle vaziyette areket etmekniñ öz variantlarını teklif etip, fevqulâde vaqialarnıñ aqibetlerinden qaçınmaq içün ne yapmaq kerek olğanı aqqında fikirleşti, bundan son oyun şeklinde öz hatalarını muzakere etti.
Rosgvardiyada, “bölgeniñ oquv yurtlarını ziyaret etip, talebelernen böyle ögretüv sübetlerinimuntazam tarzda keçirgenini” qayd ettiler.
Patlav ve atışuv çarşenbe künü, oktâbrniñ 17-nde, Keriç politehnik kollecinde oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Şeerniñ Rusiye akimiyeti, facia neticesinde 21 insan elâk oldı, dep bildirdi. Bundan soñ Qırımda üç künlik matem ilân etken edi.
Oktâbrniñ 19-nda elâk olğanlar Keriçte ve Yedi Quyu rayonında defin etildi. Keriçteki politehnik köllecinde kütleviy öldürüv qurbanlarınen vedalaşmaq içün biñlernen insan keldi.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
