Apiske alınğan qırımtatar siyasetçisi ve faali Nariman Celâl tutulğan Aqmescit SİZOsınıñ kamerası pek az qızdırıla. Bu aqta advokatı Nikolay Polozov Facebookta bildirdi.
«Kameranıñ qızdıruv problemi çezilmedi. Nariman SİZO hadimleri ara-sıra kelip, batareyadan sıcaq kelemi-yoqmı dep soray. Batareyalar qızdırmay. Yani tam suvuq degil, amma issi de degil. Kameradaki pencere de tamamen qapatılmay. Şimdilik dayanalar, amma avalar suvusa, bu problem daa keskin olacaq», – dep bildirdi advokat.
Onıñ aytqanına köre, SİZO reberligi kameranı buzdolabı ve televizornen donatmaq içün alâ daa izin bermedi. «Saç qırquv maşinasın da şimdilik izin bermeyler», – dep qayd etti Polozov.
Onıñ aytqanına köre, Nariman SİZO mahsus blokunıñ kamerasında daa bir kişinen buluna, anda haber alması zor ola.
«Narimanğa mektüp ketirmeyler. Reberlik advokatnıñ sualine cevap berip, mektüpler tsenzorda ve daa teşkerilmedi, SİZO hadimleri Narimanğa oña kimse yazmay, şunıñ içün mektüp yoq (bu yalan ola), dep ayta», – dep ayttı Polozov.
Rusiyeniñ Cezalarnı yerine ketirüv federal hızmeti Polozovnıñ aytqanlarını tefsir etmey.
Noyabrniñ 8-nde Celâl patlayıcı cihaznıñ qaçaqçılığında da qabaatlandı. Oktâbrniñ 28-nde faalniñ SİZOda qaluv müddeti 2022 senesi yanvarniñ 23-ne qadar uzatıldı.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
