Ukraina Tış işler naziriniñ birinci muavini Emine Ceppar Rusiye tahqiqatınıñ Aqmescitte apiske alınğan qırımtatar siyasetçisi ve faali Nariman Celâlğa qarşı yañı qabaatlavı aqqında malümatnı yoradı.
«Nariman Celâlğa ilk uydurılğan qabaatlavğa ilâve olaraq Qırımdaki Rusiye işğalci memuriyeti daa bir danesini qoştı – patlayıcı cihaz qaçaqçılığı. Rusiye işğalcileriniñ Nariman Celâlğa ve ağa-qardaş Asan ve Aziz Ahtemovlarğa qarşı uydurğan ceza davasınıñ saçmalığı sıñırsızdır», – dep yazdı o, Twitterde.
Advokat Nikolay Polozov noyabrniñ 8-nde Nariman Celâl patlayıcı cihaz qaçaqçılığında qabaatlandı, dep bildirdi. «Yani Gümrük birliginiñ gümrük sıñırından YevrAzES çerçivesinde teşkilâtlanğan gruppa tarafından patlayıcı cihaznı qanunsız keçirüv (Rusiye Federatsiyası Ceza kodeksiniñ 226.1 maddesiniñ 3-nci qısmı)», – dep yazdı Polozov.
Advokatnıñ qayd etkenine köre, bu maddege köre 7 yıldan 12 yılğa qadar azatlıqtan marum eteler.
FSB Celâlğa qarşı qabaatlavnı endi sertleştirgen edi, Nariman Celâlnıñ diversiya yapıluvına yardım etüv qabaatlavı diversiyada iştirak etüvge deñiştirilgen edi. Soñra qabaatlav daa bir kere sertleştirildi, Celâl 20 yılğa qadar apiske alına bile.
Oktâbrniñ 28-nde Qırımda tevqif etilgen qırımtatar faali ve siyasetçisi Nariman Celâlnıñ tevqif müddeti 2021 senesi yanvarnıñ 23-ne qadar uzatıldı.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
