Qırımda siyasiy sebeplerden apiske alınğan qırımtatar faalleri Nariman Celâl, Asan Ahtemov ve Aziz Ahtemovlarnıñ davası boyunca daa bir mahkeme oturışuvı arfesinde Qırım.Aqiqat ömür arqadaşlarınıñ açıq mektübini derc ete.
Biz, siyasiy sebeplerden apiske alınğan Nariman Celâl, Asan Ahtemov ve Aziz Ahtemovnıñ ömür arqadaşları, qorantalarımız oğrağan vaziyet aqqında hatırlatmaq ve aqaylarımıznı qorumaq ve olarğa qoltutmaq içün faal areketlerge çağırmaq içün bu muracaatta birleştik.
Er bir aileniñ saba erte daa qaranlıq olğanda evlerine sürip kirilgen ve ayatlarınıñ bir qısmı, qorantasınıñ babası ve aqayı alınğan qorqunç künü bar. Bu 2014 senesi başladı ve, ne yazıq ki, taqipler devam etkenini köremiz. Aman-aman 8 yıl içinde siyasiy mabüslerniñ sayısı 120 insandan çoq oldı. Mında qabaatsız insanlarnı alıp, saçma sahte qabaatlavlar uyduralar. Mahkeme esnası çoqusı allarda qapalı ola ve çoqtan yazılğan stsenariyge köre areket ola, ve biz ümüt etsek de, neticede qabul etilecek qararnı bilemiz. Er bir dava sahte deliller esasında tizile. Deliller advokatlarımızğa dayanamağanı içün qabaatlav tarafı er bir davada «gizli şaatlarnı» qullana. Şahsiyetni gizlev imkânlarından faydalanıp, qabaatlayıcılar stsenariyge köre kerek olğan şaatlıqlarnı saylay, mahkeme ise olarnı 10 yıldan 20 yılğa qadar apis cezaları içün yeterli saya.
2022 senesi fevralniñ 18-nde Nariman Celâl, Asan ve Aziz Ahtemovlarnıñ davası temelden baqılacaq. Bu muracaatnı oquğan er kesten mahkeme oturışuvlarını taqip etmesini, yapılğan bozuvlar aqqında aytmasını ve biznen beraber qanunsız apiske alınğanlarnı azat etilüvini talap etmesini rica etemiz. Bütün mahkemeden evelki tahqiqat areketleri pek tez keçirildi, biz mahkeme de üküm çıqarmaq ve cemaatnıñ diqqatını celp etmemek içün aşıqa-aşıqa olacaq, dep tahmin etemiz.
Bundan ğayrı, aqaylarımız, siyasiy mabüsler, uquq qoruyıcı organlar tarafından basqı ve insaniyetsiz munasebetke sistematik sürette oğratıla. Asan Ahtemov ve Aziz Ahtemovnıñ elektrik aqımı ile işkenceler aqqında ikâyesi bizim içün deşetli bir haber oldı, olarnı bu şekilde tahqiqat içün kerekli şaatlıq etmesine zorladılar. Bundan soñ olarğa kerekli tibbiy yardım kösterilmedi. Aqaylarımızğa qarşı daimiy basqı usullarından biri izolâtsiya, mektüp bermeme, Nariman Celâlda olğanı kibi mahsus kameralarda tutuv ola.
Ve er sefer balalarımızğa babası ne içün kelip olamağanını aytmaq içün yürekte ağrı ve közlerde sıcaqlıq ile küç tapamız. Şimdi böyle balalarnıñ sayısı 197 oldı
Bunıñnen beraber, bir çoq insan siyasiy mabüslerniñ ömür arqadaşları, anaları maneviy, ahlâqiy ve bedeniy olaraq ne qadar zor alda olğanını unuta. Çoqusı qorantanıñ balaları bar. Aqaylarımız içün küreşip, balalarımıznı baquv da omuzlarımızğa tüşe. Sağlıqları, muvafaqiyet ve muvafaqiyetsizlikleri, qorqularınen bağlı qasevetlerimizni ve mesüliyetimizni kimsenen paylaşıp olamaymız. Ve er sefer balalarımızğa babası ne içün kelip olamağanını aytmaq içün yürekte ağrı ve közlerde sıcaqlıq ile küç tapamız. Şimdi böyle balalarnıñ sayısı 197 oldı.
Yerli mahkeme sistemasına işanmaymız, çünki adaletsiz olğanını kördik. Vaziyetni deñiştirmek elimizden kelmegenini bilemiz. Amma aqaylarımız içün küreşimiz sizlerni olarnı qurtaracaq areketlerge ketirecek, dep ümüt etemiz. Siyasiy mabüslerge qoltutuv işinde toqtamağan, olarğa mektüp yazmağa devam etken er keske minnetdarmız, bizim içün bu pek müim.
Nariman, Asan ve Aziz içün eliñizden kelgenini yapmañıznı rica etemiz. Bizim vaziyetimizde areketsizlik ve indememezlik zararlıdır.
Bizim vaziyetimizde areketsizlik ve indememezlik zararlıdır
Aq qorçalayıcı teşkilâtlar, devlet qurulışları, halqara institutlarnıñ vekillerinden halqara-uquqiy aletlerni qullanıp ve Rusiye akimiyetini Ukraina vatandaşlarına qarşı qanunsız taqiplerni toqtatmasına mecbur etip, bütün siyasiy mabüslerniñ azat etilüvine yardım etmesini rica etemiz.
Siyasiy mabüsler mevzusını informatsion, media kampaniyaları vastasınen, maqale ve video azırlap kötermege rica etemiz. Jurnalistler içün bir-birine oşağan mahkemelerde informatsion sebep tapmaq küç olğanını añlaymız. Lâkin bu adiselerniñ arqasında bir insan ömrü bar olğanını unutmañız, lütfen, qorantası onıñ qaytacağını er kün bekley.
Adlarını aytıñız, unutmañız ve unuttırmañız!
Tuvğanlarımıznıñ azatlığı içün küreşimizde bizge yardım etiñiz!
Leviza Celâl, Nariman Celâlnıñ ömür arqadaşı
Repika Ahtemova, Asan Ahtemovnıñ ömür arqadaşı
Adile Ahtemova, Aziz Ahtemovnıñ ömür arqadaşı
Muracaatnıñ özü – mında
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.