Advokat Nikolay Polozov Facebook saifesinde bugünde Rusiye taarfından işğal etilgen qıırmda tevqif etilgen qırımtatar faali ve siyasetçisi Nariman Celâlnıñ mektübini yayınladı.
«İnsan aqları Beyannamesiniñ qabulından çoq yıl keçmesine baqmadan, serbest adamlar halqara vesiqalarda ve milliy qanunldarda qayd etilgen aq ve serbestlikleri oğrunda küreşmek kerekler. Vatandaşlar öz devletleri tarafından basqılarğa oğratıla. Suveren devletler qomşularınıñ silâlı istilâsına qarşı tura. Bizim Ukrainamız milliy birlikten, siyasiy pişkinlikten, bunıñ bir parçası işğal etilgen topraqlarda vatandaşalarını imaye etmek istegi olğan arbiy mustaqilliginden pek müim intiannı bermege devam ete», – dep yazıla mektüpte.
Celâl qayd etti ki, işğal etilgen Qırımdaki Ukraina vatandaşları içün ilk vazife Rusiyeniñ mefküreviy ücümine qarşı turıp serbest dünyağa mensüpligini saqlap qalmaqtır.
«Demokratiya degerliklerini, insan aqları em insanlar, em devlet ve vatandaşalr arasındaki munasebetlerniñ imperativ olğan cemiyette yaşamaq istegini saqlap qalmaq. Ve eñ esası, dostlar, beraberlikte duşmannı yeñecegimizge işançı ğayıp etmeñiz. Ğayret etiñiz!» – dep yazdı Celâl.
Evel, Rusiye kontrolindeki Qırım Yuqarı mahkemesi qırımtatar siyasetçisi ve faali Nariman Celâlnıñ apiste qaluv müddetiniñ uzatıluvına qarşı istinaf şikâyetini red etip, evelki mahkeme qurulışınıñ qararını deñiştirmedi.
Noyabrniñ 8-nde Celâl patlayıcı cihaznıñ qaçaqçılığında da qabaatlandı. Oktâbrniñ 28-nde faalniñ SİZOda qaluv müddeti 2022 senesi yanvarniñ 23-ne qadar uzatıldı.
Celâl insanlarnı oña ve Anğaradaki «gaz borusında diversiya» davasınıñ daa eki mabüsi Aziz ve Asan Ahtemovlarğa mektüp yazmağa çağıra.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
