Rusiye kontrolindeki Qırım polisi bildirgenine köre, tutulğan qırımlı Nariman Ametovnı büyük ihtimalnen FSB idaresine alıp kettiler. Bu aqta polis hadimleri qorantanıñ soyu ve qırımtatar faali Arsen Yakubovğa bildirdi.
«Poliske telefon ettim, olar saat 12-lerde kelip, protokol tizdi ve aytqanlarımnı yazdı. Polis onı FSB aldı, dep ayttı, amma Aqmescitkemi ya da başqa yergemi sualine idarege alğandırlar, dep cevap berdi», – dep bildire Yakubovnıñ aytqanlarını «Qırım birdemligi» cemaat birleşmesi.
Narimannıñ ömür arqadaşı Elmaz Ametova, aqayı qırımtatar faalleri Nariman Celâl ve ağa-qardaş Ahtemovlar qabaatlanğan Anğara köyünde «gaz borusındaki diversiyağa» alâqası bar olğanından şübheli sayıla, dep bildirdi.
Hatırlatamız, dekabrniñ 17-nde saba Eski Qırımda Rusiye quvetçileri qırımtatarı Nariman Ametovnıñ evini tintip, onı alıp ketti.
Rusiye quvetçileri şimdilik resmiy tefsir bermey.
Dekabrniñ 14-nde Primorskiy qasabasında (Kefe) Rusiye quvetçileri 23 yaşında qırımtatarı Kurtumer Çalgozovnı tutıp, belli olmağan tarafqa alıp ketti. Onıñ cep telefonı alındı. Tintüv vaqtında Çalgozovlar qorantasınıñ bütün azaları evde edi – baba, ana, Kurtumer ve kiçigi 7 yaşında olğan eki qız qardaşı.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
