Aqmescit civarındaki Molodöjnoye qasabasında Rusiye quvetçileri keçirilgen tahqiqat tedbirlerinden soñ Aqmescit rayonındaki Qırımtatar Milliy Meclisiniñ sabıq azası Eldar Menseitovnı tutıp, belli olmağan yerge alıp ketti. Bu aqta «Qırım birdemligi» cemaat birleşmesi haber ete.
Olarnıñ malümatına köre, Menseitovnıñ evinde sentâbrniñ 7-nde aqşam tintüv keçirildi. O vaqıttan berli ne o, ne qorantası telefonlarını açmay.
Bu malümatnı advokat Nikolay Polozov da Qırım.Aqiqatqa tasdıqladı. Onıñ bildirgenine köre, Eldar Menseitov Qırımda ğıyabiy şekilde mahküm etilgen qırımtatar halqınıñ milliy lideri Mustafa Cemilevniñ davasında şaat ola.
«O, (Eldar Menseitov – QA) Ahtem Çiygoz (Qırımtatar Milliy Meclisiniñ reis muavini – QA) davasında şaat oldı, Mustafa Cemilev davasında imaye şaatı oldı. Qayda tutuldı ve şimdi qayda buluna bilmeyim», – dep ayttı Polozov.
Rusiye quvetçileri «Qırım birdemliginiñ» malümatına tefsir etmey. Qırım.Aqiqat tafsilâtlı malümat almağa tırışa.
2021 senesi iyünniñ 18-nde Rusiye kontrolindeki Ermeni Bazar şeer mahkemesinde Menseitov «Mustafa Cemilev davasında» imaye şaatı olaraq şaatlıq etti.
Aprelniñ 30-nda Ermeni Bazar mahkemesi imaye şaatlarını sorğuğa çekip başladı. FSB, «Cemilev davası» boyunca Ukraina uquq qoruyıcılarınen bağ tutmağa yasaqladı. Bundan evel mahkeme imayeniñ FSB hadimini şaat olaraq mahkemege çağırmaq muracaatını qanaatlendirdi.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi.
Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
