Link açıqlığı

Saatnıñ esas haberi

Rusiye Mustafa Cemilev içün Qırımğa kirüv yasağını 2034 senesine qadar uzattı


Mustafa Cemilev
Mustafa Cemilev

Qırımtatar halqınıñ milliy lideri Mustafa Cemilevge Rusiyege ve şimdilik onıñ nezaretinde olğan Qırımğa kirüv yasağını 2034 senesinece uzattılar. Bu aqta Rusiye nezaretinde olğan Ermeni Bazar mahkemesinde Cemilevge qarşı açılğan cinayet işindeki materiallarnıñ baqıluvı vaqtında belli oldı, dep haber ete Qırım.Aqiqat. ​

Rusiye FSB-niñ anayasa qurumınıñ qoruvı ve terrorcılıqnen küreşüv idaresiniñ cevabından belli olğanına köre, kirüv yasağı 2019 senesi martnıñ 5-nde 15 yılğa tayin etilgen edi – 2034 senesi martnıñ 5-nece.

Qırım.Aqiqat tefsir almaq içün Cemilevge muracaat etecek.

Rusiye Cemilevge Qırımğa kirüvni yarımada işğal etilgen soñ yasaq etken edi. Amma şu müddet 2019 senesi aprelniñ 19-nda soñuna keldi, buña baqmadan Cemilev Qırımğa qaytmaq içün çareler körmedi.

Qırımdaki Rusiye Tahqiqat komitetiniñ idaresi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».

Advokat Nikolay Polozovnıñ aytqanına köre, Cemilevge qarşı oğlu Hayserniñ Ukraina davası qullanıla.

Mustafa Cemilev, işğal etilgen Qırımda oña qarşı açılğan cinaiy davalarda «Rusiye tarafınıñ qabaatlavları saçma olğanını» Avropa insan aqları mahkemesinde isbatlamağa niyetlene, dep bildirdi.

Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.

Mustafa Cemilev 1991 senesi Qırımğa qaytıp oldı.

III-IX çağırılış Ukraina Yuqarı Radasınıñ halq deputatı ola.

Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.

2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.

XS
SM
MD
LG