Qırımtatar halqınıñ lideri Mustafa Cemilev mayısnıñ 18-nde Ukraina Yuqarı Radasında Qırımtatar halqı genotsidiniñ qurbanlarını añma künü munasebetinen çıqışta bulunıp, Rusiye Qırımnıñ tamır halqına qarşı munasebetini deñiştirmedi, dep ayttı.
«Bu facialı tarih bugünge qadar keskinligini biraz coyar edi, belki, çünki asırnıñ üçte birinden çoq keçti. Amma soñki yedi yılnıñ adise-vaqiaları Rusiye ükümdarlarınıñ em öz halqını, em zapt etken topraqlarnıñ halqlarını holoplarğa çevirmek istemesinen razı olmağan halqlarğa qarşı munasebetini iç deñiştirmegenini köstere», – dep ayttı Mustafa Cemilev.
O, Yuqarı Rada deputatları Ukraina topraqlarınıñ işğalden qurtarılmasınen bağlı bütün qanun leyhalarına qol tutar, dep ümüt ete.
«Erte ya da keç işğalci bizim toprağımızdan quvulacaq! Ukraina devletiniñ topraq bütünligi ve suverenitetine uzanğan qollar sındırılacaq. Amma bunıñ vaqtı çoq şeyge bağlı, birinciden, Ukrainanıñ ve qanun berici organı Yuqarı Radanıñ qararlığına bağlı», – dep qayd etti Mustafa Cemilev.
Salı künü, mayısnıñ 18-nde, sovetler qırımtatarlarnı Qırımdan sürgün etip başlağanına 77 yıl tola. Ukraina ve dünyada qırımtatar halqı genotsidiniñ qurbanları añıla.
Ukraina prezidenti Volodımır Zelenskıy video muracaatını çıqarıp, Ukraina Yuqarı Radasınıñ baqmasına tamır halqlar qanun leyhasını berdi, dep bildirdi.
Mayısnıñ 18-nde qırımtatar genotsidiniñ yılında Ukrainanıñ Türkiye elçihanesi matem şeritli qırımtatar bayrağını endirdi.
Türkiye Tış işler nazirligi qırımtatarlarğa qol tutmağa ve «Qırımnıñ qanunsız ilhaqından soñ zulumnı toqtatmağa tırışmağa» devam etecek, dep bildirdi.
Mayıs 18 qırımtatar genotsidiniñ qurbanlarını añma yılına Kanadanıñ New Brunswic vilâyetiniñ paytahtı Fredericton Ukrainanıñ Kanada elçihanesiniñ teşebbüsine qoşulıp, qırımtatar bayrağını köterdi. Bayraq Ukraina devlet bayrağınen beraber Fredericton meriyası ögünde asıldı.
Qırımnıñ farqlı şeer ve rayonlarında qırımtatar halqı genotsidiniñ qurbanları hatırasına tedbirler keçirildi.
Qırımtatar halqı genotsidiniñ qurbanlarını añma künü
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
