Qırımdaki mahkeme imayeniñ Qırımda ğıyabiy şekilde mahküm etilgen qırımtatar milliy lideri Mustafa Cemilevge qarşı cinaiy davanıñ delillerini tedqiq etüv ricasını red etti.
Bu aqta Qırım.Aqiqat mühbiri Rusiye akimiyeti kontrol etken Ermeni Bazar şeer mahkemesinden haber ete.
Onıñ malümatına köre, avgustnıñ 6-nda olğan oturışuvda Cemilevniñ advokatı Nikolay Polozov cinaiy davanıñ eşya delillerini tekrar tedqiq etmege rica etti. Deliller arasında Cemilev diqqatsız saqlağanında qabaatlanğan karabin ve, tahqiqat versiyasına köre, vatandaşlar qullanmasında yasaqlanğan silâ parçaları bar.
Qadı Venera İsroilova delil tedqiqatını «vaqtından evel» sayıp, muracaatnı red etti. Bu oturışuvda imaye davanıñ yazma delillerini de taqdim etti. Mustafa Cemilevniñ diplomatik pasportı kösterildi, anda Rusiyege kirişi yasaqlanğanına dair bir qaydı yoq.
Nikolay Polozov dava malümatına mustaqil mütehassıslar yapqan ballistik ekspertizanı qoştı, anda qayd etilgenine köre, Cemilevniñ davası boyunca alınğan silâ parçaları vatandaşlarnıñ qullanımına uyğun ola.
Nevbetteki oturışuvnıñ keçirilüvi avgustnıñ 23-nde belgilendi.
Avgustnıñ 5-nde mahkeme Qırımnıñ Rusiye iç işler nazirliginiñ sabıq yolbaşçısı Sergey Abisovnı (2014-2018) Qırımda ğıyabiy şekilde mahküm etilgen qırımtatar halqınıñ milliy lideri Mustafa Cemilevniñ davası boyunca sorğuğa çekmek içün tekrar celpname yollaycaq ola, dep bildirdi.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi. Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
