Link açıqlığı

Saatnıñ esas haberi

«Mustafa Cemilev davası»: Qırımda İç işler nazirliginiñ sabıq yolbaşçısı Sergey Abisov tekrar mahkemege çağırıla


Sergey Abisov
Sergey Abisov

Qırımdaki mahkeme Qırımnıñ Rusiye iç işler nazirliginiñ sabıq yolbaşçısı Sergey Abisovnı (2014-2018) Qırımda ğıyabiy şekilde mahküm etilgen qırımtatar halqınıñ milliy lideri Mustafa Cemilevniñ davası boyunca sorğuğa çekmek içün tekrar celpname yollaycaq ola, dep haber ete Qırım.Aqiqat mühbiri.

Böyle muracaat Rusiye kontrolindeki Ermeni Bazar şeer mahkemesiniñ oturışuvı vaqtında avgustnıñ 5-nde qanaatlendirildi.

Oturışuvda imayeniñ eki şaatı sorğuğa çekildi – qırımtatar areketiniñ faali Nariman Celâl ve Qırımtatar Milliy Qurultayı Merkeziy saylav komissiyasınıñ reis muavini Nazim Memetov.

Mühbirniñ malümatına köre, Celâl, (Qırım ve esas Ukraina arasında – QA) «devlet sıñırı olğanına dair bir işaret» ve «Mustafa Cemilev toqtağan yerde vekâletli birini» körmedi, dep qayd etti. Onıñ bildirgenine köre, «Cemilevniñ çatışmalarğa sebep olmamaq içün Qırımğa barmaycağını eşitti».

Nazim Memetov işaretsiz qıyafette kimligi belli olmağan silâlı insanlardan keçip olamadı, dep ayttı. Mustafa Cemilevni öyle de körmedi.

Bu davanıñ nevbetteki oturışuvı avgustnıñ 6-na planlaştırıla.

Qırımda ğıyabiy şekilde mahküm etilgen qırımtatar halqınıñ lideri, Ukraina Yuqarı Radasınıñ halq deputatı Mustafa Cemilev Moskva kontrolindeki Ermeni Bazar mahkemesine kelmek talabınen celpname aldı.

Aprelniñ 30-nda Ermeni Bazar mahkemesi imaye şaatlarını sorğuğa çekip başladı. Rusiye FSBsiniñ baş idaresi, tahqiqat idaresine Ermeni Bazarda ğıyabiy şekilde mahkeme etilgen qırımtatarlarnıñ milliy lideri Mustafa Cemilevniñ davası boyunca Ukraina uquq qoruyıcılarına muracaat etmesini yasaqladı. Ermeni Bazar mahkemesi imayeniñ talabınen FSB hadimini davet etmege razı oldı.

Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».

Qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi. Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.​

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

Mustafa Cemilev

Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.

Mustafa Cemilev 1991 senesi Qırımğa qaytıp oldı.

III-IX çağırılış Ukraina Yuqarı Radasınıñ halq deputatı ola.

Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.

2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.

XS
SM
MD
LG