19 yılğa üküm etilgen Yaltadaki «Hizb ut-Tahrir davasınıñ» mabüsi Muslim Aliyev kene 10 kün Rusiye koloniyasınıñ ceza izolâtorında tutuldı. Bu aqta «Qırım birdemligi» cemaat birleşmesi Aliyevniñ tuvğanları bergen malümatqa esaslanıp bildire.
Faallerniñ malümatına köre, Aliyevniñ ömür arqadaşı Naciye Aci-Mamutova aqayı sentâbrniñ 6-nden 16-na qadar Salavattaki İK-2-niñ ceza izolâtorına avuştırılğan edi, dep tarif etti. Şimdi umumiy lagerde tutula.
«Ömür arqadaşınıñ aytqanına köre, boş vaqtı olğanda kitap oquy ve musulman hattatlığınen oğraşa, resimlerni soy-soplarına ve qorantasına yollay. Muslim Aliyev 4 ay devamında ceza izolâtorına avuştırılğan ve farqlı sebeplerden anda bulunuvı uzatılğan edi», – dep bildire «Qırım birdemligi».
Moskva vilâyetindeki (Rusiye) Vlasiha şeeriniñ Arbiy istinaf mahkemesi iyünniñ 25-nde Yaltadaki «Hizb ut-Tahrir davasınıñ» altı mabüsine çıqarılğan ükümni deñiştirmedi.
Rostov-na-Donu Cenübiy okrugı arbiy mahkemesiniñ qararınen Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi.
Amnesty International aq qorçalayıcı teşkilâtı Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Memorial» Rusiye aq qorçalayıcı merkezi beş qırımlını siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
