Link açıqlığı

Saatnıñ esas haberi

Amnesty International Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırdı


Yaltadaki «Hizb ut-Tahrir davasınıñ» mabüsleri

Amnesty International aq qorçalayıcı teşkilâtı Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırıp, bu davanıñ «sahte» olğanını qayd etti. Bu aqta halqara aq qorçalayıcı teşkilâtınıñ Ukraina bölüginiñ matbuat hızmeti Facebookta bildirdi.

«İyünniñ 22-nde Rusiye istinaf arbiy mahkemesi 2019 senesi noyabr ayında aq qorçalayıcı Emir-Usein Kuku ve beş semetdeşine «Hizb ut-Tahrir» teşkilâtı ile (Rusiyede yasaqlanğan, amma Ukrainada faaliyetine izin berilgen) alâqaları sebebinden çıqarılğan qabaatlayıcı ükümni ğayrıdan baqacaq. Biz davanı sahte dep sayamız, altı qırımlı – Emir-Usein Kuku, Muslim Aliyev, Vadim Siruk, Enver Bekirov, Arsen Cepparov ve Refat Alimovnı ise – vicdan mabüsi dep sayamız», – dep qayd etti aq qorçalayıcılar.

Daa evel Amnesty International mahküm etilgen yaltalı «İyegova şaatı» Artem Gerasimovnı vicdan mabüsi dep adlandırdı.

Hatırlatamız, Amnesty International halqara aq qorçalayıcı teşkilâtınıñ Ukraina bölügi qırımlı siyasiy mabüslerniñ balalarına qol tuttı.

Rostov-na-Donu şeeri Cenübiy okrugınıñ arbiy mahkemesi noyabrniñ 12-nde Yaltadaki «Hizb ut-Tahrir davasınıñ» altı mabüsini koloniyada qalmasına üküm etti. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.

Ukraina Tış işler nazirligi bu üküm sebebinden Rusiyege narazılıq bildirdi.

Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

XS
SM
MD
LG