İşğal etilgen Aqyar, Kefe, Şçolkino ve Kezlevde muqavemet areketiniñ aktsiyası olıp keçti, dep bildire Ukrayina Mudafaa nazirliginiñ Baş istihbarat idaresi.
Aktsiya "1000 künlik tirenüv" adını aldı ve Rusiyeniñ Ukrayinağa istilâsınıñ biñinci kününe bağışlandı.
"Bu, işğalcige daa bir işaret — Ukrayina vatandaşları işğalde areket etti ve areket etecek, çünki olar öz toprağında açuvlanğan ecnebiylerni iç bir vaqıt qabul etmeycek", — dep aytıla haberde.
İstihbarat, Rusiye ve onıñ tarafdarları Ukrayina ve vatandaşlarına qarşı yapılğan cinayetler içün mesüliyetke çekilmek kerek olğanını qayd etti.
Bir kün evelsi "Sarı şerit" areketiniñ faalleri ukrayin bayrağını Baydar yaylasınıñ eñ yüksek noqtasına kötergenlerini bildirdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
